Nietes modawat Lifetime Achievement Award

CEBU, Philippines – Si two-division world champion Donnie ‘Ahas’ Nietes sa ALA Gym gikatakda nga modawat og ‘Pinoy Pride Lifetime Achievement Award’ gumikan sa daku niyang natampo dili lamang  sa kalampusan sa maong boxing series, apan lakip sab sa talagsaon niyang nakab-ot nga naghimo kaniya nga tinuoray nga garbo sa Philippine boxing.

Ang ABS-CBN Sports ug The Filipino Channel (TFC) motunol ni Nietes sa maong pasidungog atol sa “Pinoy Pride 32: Duel in Dubai 2”, diin ang garbo sa Murcia, Negros Occidental maoy usa sa pinasidunggang  dinapit karong Agosto 7 didto sa Dubai World Trade Center sa Dubai, United Arab Emirates.

Makadasig gyud ni bisan kinsa ang natagamtaman nga kalampusan sa 32-anyos nga si Nietes, gikan sa pagka janitor ngadto sa usa sa labing bantugan nga boksidor sa nasud sa iyang henerasyon.

Si Nietes nakadawat nang daan sa prestihiyosong RING championship belt ug ingon  man espesyal nga singsing nga gidayandayan og diamante ug uban pang mahalon nga bato nga gitawag og ‘Super Champion’s Ring” sa Word Boxing Organization (WBO) gumikan sa pagkulit niya og rekord isip longest reigning Filipino world boxing champion.

Naghari isip kampiyon sa iyang dibisyon si Nietes sud sa dul-an sa walo na ka tuig aron pagbuak sa karaang rekord ni anhing Gabriel ‘Flash’ Elorde, ang Sugbuanon nga ring legend nga maoy world lightweight champion sud sa pito ka tuig ug tulo ka bulan niadtong dekada ‘60s.

Sud sa milabay nga 11 ka tuig, si Nietes way pilde-pilde. Usa sa mahinungdanon niyang daog nagkorona kaniya isip WBO light flyweight champion nga naghimo kaniya nga usa sa walo lamang ka Pinoy’ng boksidor nga midaog og duha ka world titles sa managlahing weight divisions. (BANAT NEWS)