Cebu Elite clinic himoon sa J Center Mall

CEBU, Philippines – Mobalik ang basketball clinic nga pasiugdahan sa CEBU Elite matag weekend sugod sa Agosto 8 didto sa JCenter Mall sa dan A.S. Fortuna sa dakbayan sa Mandaue.

Ang executive director ug founder sa CEBU Elite nga si Chino Uy, mibutyag sa Banat Sports nga adunay 15 ka sessioins ang himoon didto sa JCenter Mall nga himoon matag Sabado ug Domingo.

Ang maong clinic nga matag tuig himoon sab diha sa Cebu Coliseum, pagadumalaon sa mga Cebu Elite coaches nga silang Vernini Tangarorang ug Bon Rosito.

Matod pa ni Uy nga wala'y limit sa gustong mosalmot tungod kay ila rang bahinon ang oras kung daghan ang mo-apil.

Dawaton sa maong clinic ang mga interesadong kabataan--lalaki o babaye nga nagpangedaron og siete anyos ngadto na sa 17 anyos.

Ang registrarion fee matag bata dos mil pesos ug libre na niini ang bola nga ilang gamiton ingon man libreng Elite t-shirt.

Pulos malamposon ang gihimong Cebu Elite clinics ning tuiga nga miabot pa gani didto sa Dumaguete City.

Si Uy maoy kanhi point guard sa University of San Carlos Warriors ug sakop siya sa maong team nga miabante sa Cebu Schools Athletic Foundation, Inc. (CESAFI) finals sulod sa sagunson duha ka tuig niadtong 2006 ug 2007 apan napilde sila sa University of the Visayas Green Lancers. (BANAT NEWS)