CESAFI Season 15 sugdan na

CEBU, Philippines - Magpunsisok na sab  ang basketball fans  diha sa bag-ong  giinagurahan nga Cebu Coliseum sa pormal nga pagbukas sa Cebu Schools Athletic Foundation, Inc. (CESAFI) Season 15 karong adlawa.

Gilauman nga motambong sa dakung kalihukan nga sugdan sa ala-1 sa hapon mao ang bag-ong napiling  PBA commissioner nga si Chito Narvasa ug ang Cebuano basketball supertar nga si Junemar Fajardo, usa sa labing  mapasigarbuhon nga  produkto sa CESAFI, kinsa  hatagan og special award.

Molamas sab sa maong kalihukan karong adlawa mao ang  naandan nga ‘Dance Palabas”  nga naglakip sa nagkadaiyang production numbers gikan sa nagkalain-laing tunghaan ug  selection sa 2015 Miss CESAFI sa high school ug college divisions.

Si Fr. Cristopher Maspara, OAR sa University of San Jose-Recoletos maoy  mohatag sa welcome address, samtang si CESAFI President Fr. Manny Uy, SJ sa Sacred Heart School Ateneo de Cebu maoy  modeklarar sa pormal nga pagbukas sa torneyo.

Karong  tuiga, isalida ang mga duwa sa CESAFI sa IBC-13 pinaagi sa delayed basis.

“This breakthrough undertaking will surely be a big boost to the growth and development of the league,” matud pa ni CESAFI commissioner Felix ‘Boy’ O. Tiukinhoy  kabahin sa  league's TV partnership deal uban sa Viva Sports.

Ang mga duwa isunod dayon human sa programa diin ang USJ-R Baby Jaguars makigtakus  sa University of Cebu Juniors Webmasters sa alas-4 sa hapon. Ang ilang collegiate counterparts magsangka sa main game sa alas-5:30 sa hapon.   

Sa laing bahin, himuon karong alas-10 sa buntag ang pag-blessing sa bag-ong gipanindot nga sawog ug  mas gipahayag pa nga Cebu Coliseum, ang labing dakung basketball arena sa Sugbo kun seating capacity ang hisgutan.

Ang kalihukan tambongan sa mga  co-owners   nga silang Frederick ‘Lama’ Ong ug UC president Atty. Augusto W. Go, UC chaplain Fr. Lydio Felizarta, Atty. Baldomero ‘Merong’ Estenzo ug tanang CESAFI athletic directors ug uban pang mga dinapit. (BANAT NEWS)