Painters, Texters ilog sa No. 2 pick

CEBU, Philippines - Pulos mipadala og tanyag ang Rain or Shine Elasto Painters ug Talk ‘N Text Tropang Texters ngadto sa Kia Carnival aron makuha ang katungod nga mokuha sa No. 2 pick sa umaabot nga PBA Rookie draft sa Agosto 23 didto sa kaulohan.

 Ang Texters maoy unang gikataho nga mitanyag sa Kia og trade diin andam nila buhian si veteran star Ranidel De Ocampo  bugti sa No. 2 pick.

 Ang Talk ‘N Text mao na ang nanag-iya sa No.1 pick, apan gusto usab nila nga makuha ang No. 2 ilabi na nga daghang mga masaarong amateur players   ang  magpa-draft.

Apan ang Rain or Shine milihok pud aron madani ang Kia dihang ilang gitanyagan ang koponan og duha ka players bugti sa No. 2 pick.

 Segurado na nga makuha isip first overall pick ang Fil-Tongan nga si Moala Tautuaa, apan gawas sa bigman, daghan usab nga mga batan-ong players nga adunay potensiyal nga mahimong lig-ong rookie.

 Usa na niini ang kanhi collegiate standout ug sakop sa Gilas cadet nga si Troy Rosario kinsa gitan-aw sa kadaghanan nga usa sa mga lig-ong draftee sunod ni Tautuaa.  (BANAT PALARO)