JRG "Presidential Awardee" sa SAC-SMC

Ugma na sa alas tres sa hapon ipahigayon ang ika-33 nga edisyon sa tinuig nga Sportswriters Association of Cebu-San Miguel Corporation (SAC-SMC) All-Cebu Sports Awards didto sa Activity Center sa Ayala Center Cebu.

Proyekto kini sa mga lokal sportswriters ug mga editors nga maoy tugbang sa Philippine Sportswriters Association (PSA) didto sa Manila ug tungod kay nakita sa San Miguel Corporation nga usa ka dalaygon ang maong proyekto diin maoy tumong ang pag-ila ug paghatag og pasidungog ngadto sa mga Sugboanong atleta nga nanghawud sa tagsa-tagsa nila ka events ilabi na sa mga international competitions, padayon kini nilang gisuportahan.

Ang atong chairman sa The Freeman/Star Publication nga si Jose R. Gullas nga atong gitahud sa ngan nga Sir Dodong, maoy halangdong dinapit diiin mohatag siya'g usa ka "inspiration message" ngadto sa laing mga awardees tungod kay siya mao maoy makadawat sa Presidential Award gikan ni SAC president Rico Navarro.

Sa iyang pagka-sportsman diin nagbilin siya og legasiya isip usa sa labing maayong basketball player ug coach sa basketball dinhe sa Sugbo, angayan gyud kaayo nga pasidunggan si Sir Dodong, ang founder sa JRG Gullas Cup nga anaa na karon sa ika-20 nga tuig sa pagdiskubre og mga local talents sa natad sa tennis nga gisugdan niadtong 1995.

Kini maoy labing taas nga torneyo sa tennis gawas sa Metro Manila ug maoy unang torneyo nga nakakuha'g Group 2 ranking gikan sa Philippine Tennis Association.

Ang JRG Gullas Cup nga alang sa mga juniors (high school) tennis players, nag-anam kadako matag tuig ilabi sa mga mosalmot niini nga gikan sa nagkalain-laing dapit sa Visayas and Mindanao nga gustong mailhan sa natad sa tennis .

Pipila sa mga de kalidad nga produkto sa JRG Gullas Cup mao silang Jacob Lagman, Fitzgerald Tabura, Sally Mae Siso, Oswaldo Dumoran ug si Francis Casey “ Niño” Alcantara,ang 2009 Australian Open junior doubles champion.

Si Sir Dodong ug ang kinatibuk-ang Gullas family, nailhan sab nga mga relihiyoso, pilantropo ug mga educator diin siya maoy nagsilbing Executive Vice President sa University of the Visayas ug ang iyang maguwang nga si Sir Eddigul maoy president.  Ang UV nga naila sa usa sa labing maayong basketball team dinhe sa tibuok nasud ilabina sa ilang Green Lancers collegiate team, nagdala sa ilang school slogan nga "the university with a heart" kay lagi ang mga nagdumala niini pulos man mga maloloy-on nga mobati sa sitwasyon sa usa ka kabus.

Si Sir Dodong kinsa maoy kanhi president sa nabungkag na nga Cebu Amateur Athletic Association kon CAAA, nahimo sab kanhi nga co-captain sa UV Green Lancers uban ni anhing Eduardo ‘Skipper” Cabahug dihang ilang gipukan ang NCAA champions Ateneo Blue Eagles, 74-63 arong sakmiton ang titulo sa 2nd National Inter-Collegiate Basketball Championships didto sa Rizal Memorial Coliseum sa tuig 1957 nga maoy labing unang televised game sa kasaysayan sa Philippine basketball.

Gani, isip usa ka player, gitanyagan pa si Sir Dodong nga mahimong sakop sa National Team pinangulohan ni Carlos “The Big Difference” Loyzaga apan iya kining gibalibaran.

Human sa iyang panahon isip player, nahimo sab siyang coach sa Lancers diiin ilang gipukan ang UE Red Warriors ni legendary coach Virgilio  “Baby” Dalupan atol sa semifinals sa 1967 National Inter-Collegiate Championship didto gihapon sa Rizal Memorial Sports Complex sa Manila. Ilang nalangkat ang korona human ilang gipilde ang higpit nilang karibal ang Southwestern University Cobras  sa unang all-Cebu finals.

Siya sab maoy coach sa Lancers dihang mihakot sila'g duha ka titulo sa National Inter-Collegiate-- ang una niadtong 1974 dihang ilang gipilde ang La Salle Green Archers diha sa USC gym ug ang ikaduha dihang midaog na sab sila batok sa UE Red Warriors didto sa Baguio City. Si Sir Dodong maoy nagtinguha nga magkahiusa ang grupo sa basketball dinhe sa Sugbo tungod kay samtang isya pa maoy presidente sa CCAA, ila kining gi-usab ngadto sa CAAA ng karon nailhan na sa bag-ong henerasyon isip Cebu Schools Athletic Foundation, Inc. (CESAFI).