Rookie vs. Sophomore sa PBA All-Star

CEBU, Philippines - Masukod na ang kasinatian sa sophomore PBA cagers sa ilang pakigsangka sa mga rookies sa pagsugod sa PBA All-Star Week karong gabii didto sa Puerto Princesa Coliseum sa Palawan.

Ang Sophomores vs. Rookies magsugod sa alas-7 sa gabii, human sa Skills Challenge nga naglakip sa slamdunk competition, three-point shootout ug obstacle challenge sa alas-4 sa hapon.

Ang Sophomores bidahan sa scorer nga si Terrence Romeo sa Globalport Batang Pier uban nila ni Raymond Almazan (Rain or Shine Elasto Painters), Justin Melton (Purefoods Star Hotshots) ug RR Garcia (Barako Bull Energy).

Mokompleto sa ilang line-up mao sila si LA Revilla (Kia Carnival), Alex Nuyles (Blackwater Elite), Jeric Fortuna (San Miguel Beermen) ug Eric Camson (NLEX Road Warriors).

Hinuon, andam ang Rookies nga mosakbang sa mas nag-una pa nila sa liga nga Sophomores tungod  usab sa lig-on nilang line-up.

Duha ka mga Fil-Americans nga sila si Stanley Pringle sa GlobalPort ug Matt Rosser sa NLEX ang gipaabot nga mobanat alang sa mga rookies. Moduwa usab ang managsuong Pascual nga sila si Ronald (San Miguel) ug Jake (Barako Bull) uban nilang Chris Banchero (Alaska Aces), Kevin Alas (Talk N’ Text), Anthony Semerad (Globalport) ug Cebuano Brian Heruela (Blackwater). (BANAT PALARO)