Thunder, heat nag-wild

CEBU, Philippines - Mapahiyumon nga migawas sa korte si Russell Westbrook human gipakuratan sa Oklahoma City Thunder ang defending champion San Antonio Spurs pinaagi sa pagkulit og 114-106 nga kadaugan sa NBA  Christmas Day Special kagahapon didto sa AT&T Center sa San Antonio, Texas.

Didto sa American Airlines Arena sa Miami, Florida, ang Miami Heat wala mohatag og higayon nga makahuygo si LeBron James ug ang iyang Cleveland Cavaliers  aron moiskor og daog sa iskor nga  101-91.

Si Westbrok maoy nangu sa Thunder sa iyang 34 puntos ug daw wala nila pahumbalinga bisa’g wala uban kanila si Kevin Durant. Mihimo sab og 11 ka assists si Westbrook, kinsa maoy nagduslit sa ilang mainitong rally didto sa fourth  quarter.

Gipangulohan sab ni  Westbrook ang  Thunder ngadto sa ilang ikaunom nga sunod-sunod nga daog sa regular season batok sa Spurs.

Wala gihapon makaduwa ang reigning MVP nga si Durant,  samtang wala sab ang Finals MVP nga si Kawhi Leonard.

Gawas sa 34 puntos og 11 ka rebounds ni Westbrook, mihimo sab siya’g lima ka rebounds ug lima ka steals sa init kaayong performance sud sa 35 minutos.

Si Serge Ibaka mibahog og 25 puntos alang sa Thunder ug si  Steven Adams miamot og 16 puntos.

Ang sentro sa Spurs nga si Tiago Splitter nakatabla sa iyang season-high 14 puntos.

Ang duha ka lay-up  ni Westbrook maoy nagtabla sa duwa, 86-all ug mao sab ang nagduslit sa ilang 20-7 run aron hatagan ang Thunder og 102-93 nga bentaha sa katapusang tres minutos sa duwa. Sa 20 puntos nga nahimo sa Thunder, 15 niini gikan kang Westbrook.

Sa laing bahin,  si Dwyane Wade mipabuhagay og 31 puntos, diin 24 niini gikan sa first half  aron pangulohan ang nagkainit nga Heat.

Si Luol Deng midugang og 25 puntos.

Sa laing mga duwa,  gilubong sa Los Angeles Clippers ang No. 1 team Golden  State  Warriors  sa iskor nga 100-86, ang  Chicago  Bulls  yano  sab kaayong milubong  sa  Los Angeles Lakers, 113-93,  ang Washington Wizards midaog  batok  sa  New York Knicks sa iskor nga 102-91. (BANAT NEWS)