Sinulog Fun Run motak-op sa sporting events ning tuiga

CEBU, Philippines – Ang  Sinulog Fun Run  maoy  motak-op  sa  mga  kalihukan sa paugnat sa kusog ning tuiga nga ipahigayon sa Disyembre 30 diha sa Cebu  City  Sports Center (CCSC).

Ang mga  partisipante magginukdanay lang sa 5-kilometer run aron malingaw ang tanan.

Giawhag ang mga partisipante sa pagsul-ot sa ilang labing nindot nga festive costumes kay adunay premyo ang magpaabot kanila.

Ang mga organizers mohatag og P5,000 alang sa best in costume sa men ug women divisions ug laing P5,000 alang sa best dressed group. Ang labing daghang running club makadawat sab og P5,000.

Sa laing bahin, ang kampiyon sa men ug women’s category mobulsa’g P10,000, samtang ang first runner-up makaangkon og P5,000.

Ang third ngadto sa fifth  makadawat og P3,000, P2,000 ug P1,500 matag usa.

Mopahiluna gikan sa ikaunom hangtod sa ika-10  gantihan og P1,000 matag usa.

Ang entry fee nagkantidad og P300 libre na ang race bib, finisher’s shirt ug refreshment.

Mahimong magparehistro sa Athletics office sa Sinulog  Foundation office nga nahimutang sa CCSC.

Alang sa dugang mga pakisayod, tawaga ang numero 253-3700 or 254-5010. (BANAT NEWS)