Pacquiao gipasingitan na SAB

CEBU, Philippines - Nagpasingit na sab si undefeated American Floyd Mayweather Jr. ngadto ni Pinoy boxing icon Manny Pacquiao gamit ang usa ka video nga gibutang niini sa Youtube.

Si  Mayweather  gihulagway na sa makadaghang higayon nga mikakak batok ni Pacquiao, apan ang American boxer mipakita karon nga andam siya nga sangkaon ang eight-division world champion.

“I think just timing. You know, the right time, the right place, and I think that this fight should happen,” matud pa ni Mayweather. “I think the time is right, the time is now.”

Apan dungan sa positibong pamahayag kabahin sa away, si Mayweather  milabay na sab og ngil-ad nga pamahayag ngadto sa  karibal niyang si Pacquiao.

Si Mayweather mipasangil ni Pacquiao ug sa  promoter niining si Bob Arum nga maoy tinuod nga  tunok sa ilang away.

Ginganlan pa og bakakon  ni Mayweather sila si Arum ug Pacquiao  tungod kay sila ang nagpunay og lihay sa “superfight.”

Ang 37-anyos nga si Mayweather miingon nga napugos na lang si Pacquiao pakigsangka kaniya tungod kay nag-apas kini og salapi.

Gigamit usab ni Mayweather ang mga kaso sa tax ni Pacquiao isip basihan kun kinsa kanilang duha ang desperado na nga makakobra og dakung kuwarta.

Si Pacquiao  daan  nang miingon nga wala siya mag-apas sa salapi,  ang mahinungdanon alang kaniya nga mahitabo ang away alang sa mga fans ug sa iyang lalaki nga anak nga gusto makakita sa away. (BANAT PALARO)