Portmen ug alin mihimo'g record

CEBU, Philippines – Mihimo'g tournament records ang Customs Portmen ni dribbling Customs Police Boodie Monteno ug ang Alin Brokers ni team owner Israel Alin atol sa pagtak-op sa elimination round sa 3rd season sa BOC-CIPU Friendship Cup basketball tournament kaniadtong Huwebes sa kagabii didto sa barangay Tinago gym, ning dakbayan.

Kini human mokulit og 11-0 sweep ang Portmen, ang ikaduhang team nga nakahimo niini human ilang gipatapsingan ang Alin Brokers, 78-77. Nakahimo' na'g sweep kaniadto ang MJDL Brokers sa 7-0 dihang walo pa lang sila ka teams apan mas lisud ang record sa Portmen tungod kay mas daghan og lig-on nga teams karong tuiga.

Sa samang paagi, record sab sa Alin Brokers ang pagtapos sa elimination round isip second placer sa ilang 8-3 nga baraha tungod kay karon pa mahitabo sulod sa tulo ka tuig nga nakab-ot nila ang maong pwesto.

Si Jaypee Maunes miposa og 22 puntos alang sa Portmen samtang miburak og 30 puntos si Ryan Villomo aron pangulohan ang Alin Brokers.

Sa laing duwa, kaniadtong Huwebes, nasakmit sa MCWD ang ikaupat nga pwesto human ilang gilumsan ang Rollway-Petracorta sa iskor, 95-89.

Kauban sa MCWD sa Top 4 nga moabante deretso sa crossover quarterfinals nga mao ang no. 1 Portmen, no. 2 Alin Brokers ug ang no. 3 Lao Brokers.

Ning maong torneyo, wala'y awtomatik matagak tungod kay bisan ang labing ubos nga team may higayon pa nga moabante sa sunod round human sila mopailawon sa second round playoffs diin ang no. 5, 6,7 ug 8 teams adunay twice-to-beat advantage batok sa no. 9, 10,11 ug 12 sugod karong gabii diin unang magsangka ang #8 seed CEI ni Wiljohn"Sugar" Camay batok sa #9 Transwise samtang mosunod dayon ang sangka tali sa #5 Rollway-Petracorta batok sa #`12 Global Carrier. (BANAT NEWS)