CCSI yawi paglambo sa mga atleta sa Sugbo

CEBU, Philippines - Daku og papel ang Cebu City Sports Institute sa programa sa pagpalambo pa sa sports program sa Team Cebu City.

Kini ang gipadayag ni Cebu City Mayor Michael Rama atol sa turnover sa CCSI building kagahapon didto sa Brgy. San  Nicolas.

Gidasig ni Rama si Cebu City Sports Commission (CCSC) chairman Edward Hayco nga ipadayon ang iyang programa sa pagpangita og mga Cebuano champion athletes sa umaabot.

Ang CCSI daku og matabang tungod kay mahimo kining ikaduhang sporting venue sa mga Cebu City athletes sunod sa Cebu City Sports Center.

Sa iyang bahin, si Hayco miangkon nga wala siya magdahom nga maporma nila ang CCSI, apan human sa upat ka tuig nga renovation ug kapin sa P5 million nga budget,  napanindot nila ang kanhi San Nicolas Sports Complex.

Gawas sa sports, gusto usab ni Rama nga mahimong paagi ang CCSI sa pagpalambo sa disiplina sa mga batan-ong atleta.

Ang mga grassroots training program nga libreng gitanyag sa CCSI naglakip sa athletics, basketball, boxing, volleyball, badminton, tennis, table tennis, mixed martial arts, dancesport ug Muay Thai.