Convergys 2 milangkat sa Division 2 title sa 10th CSCC E-League cagefest
CEBU, Philippines - Ang Convergys 2 Blue Devils mipilde sa ePerformax Reds, 66-57 sa rubbermatch sa ilang “best-of-three” finals series aron masakmit ang Division 2 title sa 10th CSCC E-League basketball tournament niadtong Sabado diha sa City Sports Club-Cebu gym sa Cebu Business Park.
Si Clifford Amarado miiskor og 17 puntos, uban ang upat ka assists alang sa Blue Devils, kinsa miarangkada dayon pagsugod aron moposte’g 16 puntos nga bentaha sa halftime, 37-21.
Hinuon, ang ePerformax milusad sab sa kaugalingon nilang opensiba sa third quarter pinaagi sa 23-9 run aron makan-an ang labaw ngadto na lang sa dos puntos, 44-46 paingon sa final period.
Napukaw ang garbo sa Convergys 2 ug mipakgang sa dautang tinguha sa ePerformax sa hinapos nga bahin sa duwa aron maangkon ang nuybe puntos nga kadaugan.
Sa maong kadaugan, ang Convergys 2 nakaangkon og katungod sa paghagit sa Division 1 titlist ug defending champion Teleperformance Vipers sa “best-of-three” championship nga unya pa sugdan sa Nobiyembre 8 kay ang liga mopahuway og usa ka semana aron pagtamod da All Saint’s ug All Soul’s day.
(BANAT PALARO)
- Latest
