Cobras hari sa AUBC

CEBU, Philippines – Laing torneyo apan susama’g resulta dihang  ang Southwestern University (SWU) Cobras midaog gihapon batok sa ilang  higpit nga karibal  University of San Carlos (USC) Warriors, 68-66 aron sakmiton ang titulo sa 10th Asian University Basketball Championship (AUBC) Cebu Province International Collegiate Cup niadtong Domingo sa gabii didto sa Cebu City Sports Institute Gym sa barangay Sawang Calero, ning siyudad. Ang Cameeronian nga si Landry Sanjo mipabuhagay og 18 puntos aron sab madaog niya ang MVP trophy. Si  Jasper Parker  mitampo’g 17 puntos, samtang si Mark Jayven Tallo miamot og 16 puntos alang sa Cobras nga midaog  sa ilang ikaduhang sunod-sunod nga titulo sud lang sa usa ka semana. Ang SWU mipukan sab sa USC aron maangkon ang 2014 CESAFI collegiate basketball championship niadtong Oktubre 19.

Naglabaw  og 20 puntos ang Cobras, 51-31 sa tunga-tungang bahin sa third period,  apan gipapas kini sa Warriors. Hinuon, wala mahingpit ang ilang rally tungod sa mga krusyal nilang sipyat sa  free throws hinungdan nga napilde sila'g dos puntos.  Si Shooster Olago maoy nangu sa Warriors sa iyang 16 puntos, gisundan nilang Victor Rabat  ug Nike Montalbo  nga adunay 16 ug  12 puntos  matag usa. 
Sa sayo pa, ang Myongji University sa Seoul, South Korea ang miangkon sa ikatulong dapit human gipilde ang University of the Visayas (UV) Green Lancers, 73-70.

Si Jung Jinghyun maoy  nangulo sa bisitang Myongji University nga miburak og 18 puntos, samtang ang Lancers gipangulohan nilang Alfred Codilla ug Jerome Napao nga adunay 14 puntos matag usa. (BANAT NEWS)