10th AUBC sugdan na

CEBU, Philippines – Pormal na nga sugdan ang  10th Asian Universities Basketball Championship-Cebu Province International Collegiate Cup karong gabii didto sa dakbayan sa Bogo.

Human sila magbagat sa best-of-five title series sa 14th Cebu Schools Athletic Foundation, Inc. (CESAFI) nga natapos niadtong Domingo, magtakus na sab ang Southwestern University Cobras ug ang University of San Carlos Warriors, apan sa lain na  nga entablado nga mao ang AUBC  Cebu Province.

Ang Cobras ug Warriors ugma pa hinuon magbagat pag-usab didto sa lungsod sa Dalaguete sa habagatang bahin sa Sugbo tungod kay lain ang ilang  kontra karon didto sa Bogo.

Ang Cobras  makigsangka batok sa CESAFI third placer University of the Visayas (UV) Green Lancers sa alas 6:30 sa gabii sa dili pa makigsangka ang Warriors batok sa Myongji University gikan sa Seoul, South Korea sa main game sa alas 8 sa gabii.

Naglutaw pa karon sa buhilaman ang Cobras human sa ilang kadaugan sa Game-5 batok sa Warriors aron sakmiton ang ilang ikaduhang korona sa CESAFI.

Ang Cobras upat na ka sunod-sunod nga higayon nga  miabante sa finals -- duha ang pilde (UC ug  UV) ug duha sab ang daog, (UV ug USC).

Lahi na hinuon ang hulagway sa line-up sa Cobras tungod kay dili moduwa silang Landry Sanjo, back-to-back MVP awardee Mark Jayven Tallo ug Jovannie Luz. Apan matud pa ni coach Raul 'Yayoy' D. Alcoseba nga usa lang gihapon ka lig-on ang moduwa alang sa lima ka adlaw nga torneyo.

“ The school (SWU) has already made a commitment to participate in the tournament. It's only that we will be playing without the main core of our lineup,” matud pa ni Alcoseba, kinsa dili mo-coach alang sa Cobras atol sa AUBC tungod kay moadto siya sa Iloilo isip head of delegation sa Cebu Province sa Batang Pinoy Games.

Gikan sa Dalaguete, ang torneyo mobalhin sa Minglanilla inig ka Biyernes diin magsangka ang UV batok USC ug SWU batok Myongji.

Ang crossover semifinals himuon sa Oktubre 25 diha sa USC-main campus gym.

Ang mga mananaog magsangka alang sa kampiyonato karong  Domingo diha gihapon sa USC gym.

Ang team nga makatigum og labing daghang daog maoy ilhong kampiyon sa maong torneyo.

Gipasiugdahan ni Cebu City Sports Commissioner Lorenzo ‘Chao’ Sy, ang AUBC cagefest gisuportahan sa Cebu provincial government ubos sa liderato ni Governor Hilario ‘Junjun’ Davide III uban nilang    Mayor Celestino ‘Junnie" E.’ Martinez Jr. sa Bogo, Elanito Peña sa Minglanilla, Ronald Cesante sa Dalaguete ug sa Hotel Fortuna. (BANAT NEWS)