Lexmark hari sa ‘Goal for Jacob’ bootfest

CEBU, Philippines – Ang Lexmark football  team maoy nakampiyon  sa men’s division sa “Goal for Jacob,” usa ka charity football tournament nga gipasiugdahan sa Leylam FC niadtong Domingo didto sa Cebu International School (CIS) football field sa barangay Talamban, ning siyudad.

Mipatigbabaw ang Lexmark batok sa Leylam FC Team B, 3-1 alang sa korona. Ang San Miguel FC-A miangkon sa ikatulo nga dapit.

Sa pikas bahin, ang Accenture mao sab ang midaog sa korona batok sa ePerformax pinaagi sa shootout, 3-1, samtang ang Lexmark nalandig sa ikatulo.

Ang charity event ipahinungod ngadto sa usa ka tuig nga bata nga si Jacob, kinsa gikatakdang ipaubos sa iyang “club foot” usa ka congenital deformity nga makahasol sa tiil. Ang bata anak sa usa ka production staff sa Leylam. (BANAT NEWS)