SWU cobras misakmit sa titulo

CEBU, Philippines – Napamatud-an gyud nga ang ilang taas kaayong championship experience maoy maghatag sa Southwestern University Cobras og dakung bentaha batok sa University of San Carlos Warriors aron masakmit ang titulo sa Cebu Schools Athletic Foundation, Inc. (CESAFI) sa seniors division pinaagi sa pag-iskor og 64-49 nga kadaogan kagabii sa Game 5 sa ilang do-or-die battle didto sa Cebu Coliseum.

Gawas sa maayo nilang depensa, nagmangtas silang Landry Sanjo ug si Mark Jayven Tallo aron pangulohan ang opensa sa Cobras ug tataw nga nausab og kalit ang duwa sa Warriors kun itandi sa Game 4 diin ilang natabla ang series sa 2-2 pinaagi sa pag-iskor og 56-48 nga kadaogan sa miaging adlaw.

Taud nga may pagka-langay sa duwa tungod sa mga kasikas gikan ra sab sa mga coaches diin parehong mireklmao sa mga tawag sa referees silang Raul "Yayoy" Alcoseba ug Junthy Valenzuela dihang nag-anam na kapisikal ang duwa.

Kutob lang sa first quarter ang gipakita nga maayong duwa sa Warriors tungod kay human molabaw ang Cobras sa 8-6 sa basket ni Daryl Goloran, kalit lang misutoy ngadto sa 11 puntos nga labaw ang Cobras, 19-8 human sa maong period.

Walay puas nga puntos ang gipabuhagay sa Cobras didto sa third quarter diin ang ilang 12 puntos nga labaw sa halftime, 32-20, dali ra kaayong miburot ngadto sa 17 puntos, 42-25 apan ang labing dako nga labaw miabot ngadto sa 23 puntos sa fourth period human sa three-point ni Tallo, 60-37 may 5:58 pa ang nahibiling oras sa duwa.

Si Tallo kinsa maoy napiling MVP sa duha ka sagunson nga season, mibahug og 19 punts samang si Sanjo mihakot og 20 puntos.

Sa labing unang higayon sa series, walay player sa Warriors nga nakahimo'g double figures tungod kay parehong may nuybe puntos matag usa silang Charles Pepito ug Espoir Toyambi. Grabe ang pagkunhod sa duwa ni Shooster Olago kinsa na-apektohan pag-ayo sa hugot nga depensa gawas sa sa daghan kaayong turnovers ug ang kugihan nga Cameroonian import igo lang miamot ug kuatro puntos, ang labing gamay niyang nakuha karon nga season.

Si Rabat usa sa napiling sakop sa Mythical Five lakip kanilang John Michael Abad sa University of the Visayas Green Lancers, Kevin Villafranca sa University of San Jose Recoletos, Sanjo ug Tallo. (BANAT NEWS)