Adlaw sa paghukom

CEBU, Philippines - Suwayan karon sa Southwestern University (SWU) Cobras nga masumpo ang dautan nga kasinatian nga mihamok kanila sa finals sa miaging tuig, samtang maoy tinguha sa University of San Carlos (USC)  Warriors nga putlon ang ilang 56 ka tuig nga huwaw diin wala na sila makatilaw og kampiyonato pag-usab gikan sa tuig 1958.

Sa katapusang higayon ning maong season, ang SWU ug USC magsangka sa deciding Game-5 sa seniors division title sa 14th Cebu Schools Athletic Foundation, Inc. (CESAFI) basketball tournament karong adlawa diha sa Cebu Coliseum.

Buot nang ilubong sa kalimot sa Cobras ang ilang sakit nga kapildihan sa Game-5 batok sa University of the Visayas (UV) Green Lancers sa 2013 Finals, samtang ang Warriors  maninguha nga matambalan ang ilang kauhaw sa kampiyonato sud sa dugay nang panahon.

Ang Cobras midaog  sa Game-1, 59-55 apan ang Warriors mibawos sa Game-2, 53-46 aron malikayan ang 0-2 sa series.  Nakauna na sab ang SWU human modaog sa Game-3, 60-49, apan ang USC nakabawi sab sa Game-4, 56-48 aron mapugos ang series sa rubbermatch.

Sa kadaghanang duwa karon nga season, ang import nga si Shooster Olago maoy kanunay mangu sa kadaugan sa Warriors  uban ni Espoir Toyambi. Napuhalan  nila  ang tandem sa Cobras nga silang Landry Sanjo ug Bendley Valdor sulod sa upat ka duwa sa series.

Busa, kun maayo man gani ang mga lokal sa Cobras, adto kini mabawi nilang Olago ug Toyambi.

Daghan sa mga pangagpas nga kun  championship experience maoy himuong sukaranan, mas nakabentaha ang Cobras ni coach Raul ‘Yayoy’ Alcoseba sa ilang do-or-die battle.  Dugang pa niana, diha na sa miaging tuig ang mga local players nga silang Mark Jayven Tallo, Adams Mohammed, Bernie Bregondo, Daryl Goloran, Melvin Holper ug ingon man si Sanjo dihang napilde sila sa UV sa miaging tuig.

Ang diha sa USC sa miaging tuig mao silang  Dolan Adlawan, Victor Rabat, Christian Laude, Nico Magat, Charles Pepito ug Kiefer Lim. (BANAT NEWS)