MP brokers naka-uno na gyud

CEBU, Philippines – Kung dunay Fernando Poe, Jr. sa salida, duna sab diay sa 3rd BOC-CIPU nga lega--magpakulata sa primero apan lagi tungod kay bida, dili madali-dali katumba.  Matod pa gyud sa mga players sa MP Brokers ni team owner Marty Pimentel ubos ni coach Caleb Gawangon, ang "pag-uno ray lisod" ug human sila maka-ipsot batok sa Alin Brokers nga gipangulohan sa ex-USJR Jaguar power forward Migue Tabaloc sa iskor, 79-74 kaniadtong Huwebes, nagtuo sila nga mao na kini ang senyales nga matuman ang ilang damgo nga moabante sa semifinals.

Pinangulohan ni spitfire Beking Rollon, nag-aso-aso dayon sa kainit ang 1-2 MP Brokers ug human sa ilang 6-0 start, misutoy dayon ang ilang labaw ngadto sa double figures halos sa kinatibuk-ang duwa sa wala pa hingpit nga maka-rally ug makasikit ang Alin.

Si Ryan Villomo maoy nangu sa 2-1 nga Alin Brokers sa iyang 19 puntos apan nausab ang duwa sa usa sa ilang sinaligan nga si Jonas Cayanong human madakdak ang aping sa sawug hinungdan napugngan siya ngadto lang sa tres puntos. Midugang og 18 puntos si Tabaloc kinsa maoy midominar sa ilawom.

Sa sayo pa, gipakuratan sa Lao Brokers ang Rollway-Petracorta aron patilawon sa una nilang pilde, 95-88. Tungod sa maong kadaogan, nagtabla karon ang Lao Broker ug Rollway sa 3-1 nga kartada.

Puntos matag usa:

First Game:

Lao Brokers (95)---    Plando 18, Factor 17, Jadraque 16, Bugtai 13, Ramos 11, Davila 8, Velasquez 6, Amaro 4, Batiquin 2.

Rollway-Petracorta (88)---   Moral 21, Tarona 21, Berame 15, Palero 14, Olloves 5, Palad 4, Generalao 3, Solidarios 3, Villaronza 2, Sagario 2.

Second Game:

MP Brokers (79)---     Rollon 17, Enriquez 10, E. Medalle 9, Abellana 8, Vilacastin 8, Elloren 8, Amistoso 6, Bensi 5, Gambe 3, Pangue 2, N. Medalle 2, Pimentel 2.

Alin Brokers (74)---     Villomo 19, Tabaloc 18, Barral 11, Lleve 10, Estorgio 8, Alin 5,Cayanong 3.