Mga duwa sa CESAFI giuswag tungod sa dautang panahon
CEBU, Philippines - Gikanselar sa Cebu Schools Athletic Foundation, Inc. (CESAFI) ang gikatakda unta nilang mga duwa kagahapon tungod sa dautang panahon dala sa bagyong “Mario” nga miresulta sa pagbaha sa mga kadalanan dinhi sa Metro Cebu.
Ang maong pahibalo giluwatan ni CESAFI commissioner Felix O. Tiukinhoy Jr.
Ang mga duwa himuon ugma diin tulo ka mga duwa ang mahitabo.
Ang No. 2 seed University of the Visayas (UV) makigsangka sa seventh-seed University of San Jose-Recoletos (USJ-R) Baby Jaguars sa alas-2 sa hapon, samtang ang third seed University of San Carlos (USC) Baby Warriors makigbatok sa No. 6 team University of Southern Philippines Foundation (USPF) Baby Panthers sa alas-3:45 sa hapon.
Sa main game, ang Southwestern University (SWU) Cobras nagtinguha na sab mosakmit og luna sa finals sa dihang ilang sangkaon ang USJ-R Jaguars sa semifinal round sa seniors division.
Ang Cobras-Jaguars showdown sugdan sa alas-6:45 sa gabii. Ang modaog sa series maoy makakuha’g katungod sa pakigsangka sa nagpaabot nga USC Warriors, kinsa mipalagpot sa defending champion UV Green Lancers niadtong Miyerkules. Ang Cobras, Baby Lancers ug Baby Warriors pulos adunay “twice-to-beat” advantage.
Kun adunay playoffs, si Tiukinhoy miingon nga ang mga duwa duwaon karong Domingo. Ang semifinal rounds sa juniors division sabotan kini nga sugdan sa Domingo. (BANAT PALARO)
- Latest
