SWU, USJ-R ilog sa katapusang lingkoranan sa Finals

CEBU, Philippines - Walay laing gitanom sa alimpatakan sa Southwestern University (SWU) Cobras kun dili ang pagbalik sa finals sa ikaduhang sunod-sunod nga higayon sa dihang ilang sangkaon ang University of San Jose-Recoletos (USJ-R) Jaguars sa semifinal round sa 14th Cebu Schools Athletic Foundation, Inc. (CESAFI) basketball event karong adlawa diha sa Cebu Coliseum.

Ang Cobras ug Jaguars magsangka  sa alas-6:45 sa gabii human sa duwa sa University of San Carlos (USC) Baby Warriors nga naglaraw nga moabante sa semis sa pakigsangka nila batok sa University of Southern Philippines Foundation (USPF) Baby Panthers sa juniors division sa alas-5:15 sa hapon.

Bitbit ang  twice-to-beat advantage, ang  Cobras nagkinahanglan lang og usa ka daog aron moabante sa championship round.  

Kun line-up ang hisgutan, dili kabintahaan ang Cobras tungod kay daghan silang kasaligan  itandi sa Jaguars nga walay lain ikapanghambog kun dili ang presensiya sa ilang bugtong import nga si Quentin Luzoladio.

Laing kasaligan sa SWU mao silang Mark Jayven Tallo, Jasper Parker, Melvin Holper, Landry Sanjo, Bernie Bregondo, Daryl Goloran ug ang 3-point shootout king nga si Anton Tomas Pardo.

  Labing menos, tulo sab ka alas ang kasandigan sa Jaguars nga sila si James Regalado, bigman Kevin Villafranca ug ang speed demon nga si Mark Labares.

Moabag sab nila  silang  Renzo Tedore Senining, Iron Suano, Raymond Catipay, Fletcher Galvez, Kyle Lajato, Jim Custan ug Nelvin Navarra. (BANAT NEWS)