Maroon-JIB Auto Parts kampiyon sa sunday club cagefest

CEBU, Philippines – Nakab-ot sa Maroon-JIB Auto Parts ang ilang pangandoy nga mokampiyon human sila makapanalipod sa makalisang nga ataki gikan sa karibal nilang Orange team atol sa “knockout” finals didto sa San Roque Parish (SRP) gym sa Brgy. Subangdaku, dakbayan sa Mandaue. Ang Maroon-JIB Auto Parts mipilde sa Orange, 81-77 aron masakmit ang korona ug ilhon isip kampiyon sa SRP Sunday  Club 6th Founding Anniversary League basketball tournament.

Nanghasi dayon ang Maroon-JIB Auto Parts ni team owner/manager Alex Tecson sa unang duha ka kuwarter sa pagpangulo nilang Benito Aton Jr. ug Eric Obra aron moabante og 18 puntos sa halftime, 55-37. Nahulga hinuon ang Maroon-JIB Auto Parts sa hinapos nga bahin sa third period dihang misalida si Ohing Ortiz alang sa team Orange nga mikitkit sa labaw ngadto na lang sa uno punto, 65-64 paingon sa final period.

Sukad niadto, ang Maroon-JIB Auto Parts wala na makabiya’g daku ug nakuratan pa gani kini dihang milabaw ang Orange sa labing unang  higayon, 77-75 kortesiya sa basket ni Ortiz sa nahabiling 1:40 sa duwa. Apan naungot ang iskor  sa Orange ug wala na kini makahimo’g basket sa nahabiling mga gutlo sa duwa tungod sa grabeng depensa sa Maroon-Auto Parts ilabi na ni Tecson.

Si Aton nga maoy napiling MVP maoy topscorer sa Maroon-JIB Auto Parts pinaagi sa iyang 16 puntos, gisundan ni Obra nga adunay 14 puntos. Si Tecson kansang katapusang basket sa hinapos nga bahin sa duwa nakapaseguro sa ilang kadaugan ug si Joel Aniñon mitimbre’g 10 puntos matag usa.

Sa iyang bahin, si Ortiz miposa’g 17 puntos aron maoy mangu sa Orange team. Si Cariño miabuno’g 14 puntos, gisundan ni Ritchie Tecson sa iyang 11 puntos ug Gideon Ipili nga adunay 10 puntos.

Sa labing unang higayon, ang liga mipasidungog sa Mythical Five. Kini naglakip nilang Ohing Ortiz sa Orange, Alex Gonzaga sa Violet, Glenn Ramirez sa Red ug Eric Obra ug Pitpit Anghay sa  Maroon-JIB Auto Parts. (BANAT NEWS)