SHS-AdC miharos sa elimination round
CEBU, Philippines – Gikuninitan og maayo sa Sacred Heart School-Ateneo de Cebu (SHS-AdC) Magis Eagles ang mas gagmay nga University of San Jose Recoletos (USJ-R) Baby Jaguars, 91-59 aron mokulit og talagsaon nga elimination round sweep sa 14th Cebu Schools Athletic Foundation, Inc. (CESAFI) kagabii didto sa Cebu Coliseum.
Walay gikasukol ang Baby Jaguars sa kaigmat sa Magis Eagles, kinsa mitapos sa elimination round tangag ang 8-0 nga baraha.
Gikan sa 17-7 sa first period, dali kaayong miburot ang labaw sa Magis Eagles ug miabot kini’g 23 puntos sa halftime, 41-18 gamit ang 24-11 scoring run diin 12 puntos niini gikan sa ilang abtik nga point guard nga si Niño Araw-araw.
Si Joshua Sinclair maoy nangu sa Magis Eagles sa iyang 16 puntos, gisundan ni Araw-araw nga adunay 14 puntos ug Jose Piero Dominic Longa nga miamot og 10 puntos.
Ang 1-5 nga Baby Jaguars gipangulohan sab ni Rubas sa iyang 21 puntos samtang si Brian Divinagracia mitampo’g 17 puntos. Si Richmond Lapinid miabuno’g 11 puntos alang sa kapildihan. (BANAT NEWS)
- Latest
