Accenture lider na sa Division 1

CEBU, Philippines – Gipakuratan sa Accenture Sharks ang Lexmark Stallions, 59-51 aron makuha ang solong liderato sa Division 1 sa CSCC E-League basketball tournament didto sa City Sports Club-Cebu gym sa Cebu Business Park.

Ang Accenture nabiyaan og 11 puntos sa halftime, 24-35, apan milusad kini’g 15-0 run sa  third period ug ilang na-outscored ang Lexmark sa fourth quarter, 22-6 aron maangkon ang daog.

Si Ildefonso Bulangis Jr. mihipos og 22 puntos, samtang si Archie Brian Vincent Batua miabuno’g 15 puntos alang sa Accenture nga nagtangag og 8-1 nga baraha. Si Oneil Sahilan mao lang ang miiskor og double figures sa iyang 10 puntos alang sa Lexmark nga nakatilaw sa ilang ikatulong pilde sa walo ka duwa. (BANAT NEWS)