USC warriors, UV mag-usab

CEBU, Philippines- Magbagat pag-usab ang University of  San Carlos Warriors ug ang University of the Visayas Green Lancers sa pagbalik sa second round of eliminations sa nagpadayon nga 14th season sa Cebu Schools Athletic Foundation, Inc. (CESAFI) men's basketball tournament karong gabii didto sa Cebu Coliseum.

Sa juniors division, ilogan sa Baby Lancers ug sa Baby Warriors ang ikaduhang pwesto sa usa ka krusyal nga sangka karong hapon.

Ang Lancers kinsa napilde sa Warriors sa first round sa iskor, 74-83 pinaagi sa overtime kaniadtong Agosoto 9, mosuway pagbawos sa maong kapildehan ilabi na kay napilde sab sila sa University of San Jose Recoletos  Jaguars, 63-67 sa wala pa ang two-day break niadtong Agosto 28 nga maoy nakaguba sa ilang damgo nga moabante sa semifinals nga adunay twice-to-beat advantage ug karong gabii, anaa sila sa must-win situation aron dili mabiyaan og samot sa team standings.

Sa ilang 4-4 win-loss record, kinahanglan nga ipakita sa Lancers ang ilang katakos batok sa nagkakusog ug nagka-umento nga Warriors kinsa giila karon isip "team of the future" nga gidudahan gani nga posibleng maoy modaug sa titulo sa higayon nga moabante sila sa finals.

Kini tungod sa ilang duha ka kugihan nga re-enforcement nga silang Shooster Olago ug Espoir Toyambi nga maoy naghatag kanila'g kalig-on sa opensa.

Makabalik na sab og duwa karon si Nico Magat alang sa 6-1  human sa one-game suspension ug dako siya'g ikaamot sa opensa uban kanilang Charles Pepito, Ian Ortega, Christian Laude, Victor Rabat ug Kiefer Lim.

Sa laing bahin, ang Lancers makasalig sab sa ilang imports nga silang Jean Marie Mpouma ug Jeff Aguara uban kanilang John Michael Abad, Chris Perolino, Rhaffy Octobre, Francisco Arong ug Alfred Codilla.

Sayo karong hapon, ang 5-1 nga Baby Warriors makigtakos batok sa 6-1 Baby Lancers diin ilang ilogan ang ikaduhang pwesto tungod kay pareho silang napilde sa defending champion Sacred Heart School-Ateneo de Cebu Magis Eagles kinsa naghupot og 6-0 nga baraha. (BANAT NEWS)