Pagkayab ni Conde sa motocross makita ugma
CEBU, Philippines - Pagkayab ni Ted Conde sa motocross maoy ipasalida sa ikalimang yugto sa MX-R LS (Motocross Rider Life Story), ang bag-ong segment sa MS Motosuit Motocross TV series nga makita sa CCTN 47 matag Sabado (10:00-10:30 am). Ang replays sa tunga sa oras nga pasundayag makita matag Domingo (10:30-11:00 pm).
Sa dihang bata pa ang Sugbuanong si Conde, damgo niya nga mahimong motocross rider, apan tungod sa kawad-on, miapil lang una siya og BMX racing atol sa sayong bahin sa iyang athletic career nga maoy hagdanan aron mahimong motocross stardom.
“When I was a child, I really dreamed of becoming a motocross rider but my parents couldn’t afford to buy me a motorbike during that time that is why I just concentrated on BMX. However, in one of the BMX events I joined way back in 1995 in Ozamiz, a friend suddenly approached me and asked me if I wanted to try motocross. Without a second thought, I said yes,” matud ni Conde, nga lumad taga Daanbantayan, Cebu.
Bisan og dili pa hinog ang iyang kasinatian, si Conde mihimo dayon og dakung impact sa motocross racing circuit pinaagi sa pagdaog sa overall championship sa beginners class sa National Motorcycle Sports and Safety Association-organized nationwide series nga gibahin sa 12 ka legs niadtong 1996. Sa tuig 1997, siya sab ang novice overall champion, sa wala pa modominar sa intermediate category sa 1998.
Walay nakapugong sa pagsulbong ni Conde dihang nalandig siya sa top eight sa mga elite pro riders niadtong 1999.
Apan sa wala damha, si Conde nakaangkon og injury sa iyang paa nga nakapahunong kaniya sud sa pipila ka katuigan. Sa iyang pagbalik sa 2012, si Conde mipahiluna sa ikatulo sa overall sa pro category sa Sel J Sports Series.
Nanghawod sab siya sa pipila ka mga lumba sa MS Motosuit Motocross Series nga gipasiugdahan ni sportsman Lou Ornopia. (BANAT PALARO)
- Latest
