UV, CIT-U mag-usab

CEBU, Philippines - Paminalos maoy anaa sa alimpatakan sa University of the Visayas (UV) Green Lancers sa ilang duwa batok sa  Cebu Institute of Technology-University (CIT-U) Wildcats sa pagsugod sa second round sa 14th  Cebu Schools Athletic Foundation, Inc. (CESAFI) basketball tournament diha sa Cebu Coliseum.

Wala pa malimot ang UV Lancers sa ilang talagsaon nga pilde gikan sa mga kamot sa CIT-U Wildcats, 60-67 niadtong Agosto 3.

Gawas nga mobawos sa maong kapildihan,  ang mga batos ni coach Felix ‘Donbel’ Belano Jr. naglaum nga malimpiyohan ang labing bati nilang sinugdanan sa 14 na ka tuig nga liga diin midaog lang sila og kaduha sa unang lima ka duwa.

Mas makapabor karon ang UV Lancers tungod kay ang CIT-U Wildcats walay reinforcement.  Ang presensiya nilang    Jean Marie Mpouma ug Jeff Aguara maoy makahatag nila’g dakung bentaha sa UV Lancers uban sa mga lokal sama nilang John Michael Abad, Francisco Arong, Chris Perolino ug Rhaffy Octobre.

Ang CIT-U Wildcats sa ilang bahin, mosandig nilang Joshua de la Cerna, Allan Dimco, Jose Marlo Pono, Franklyn Batiquin ug Jeffrey Taghoy.

Gawas sa UV-CIT-U rematch, gipaabot karon sa CESAFI fans ang unang panagbagat sa mga way pildeng juniors teams --  Sacred Heart School-Ateneo de Cebu (SHS-AdC) Magis Eagles ug  University of San Carlos (USC) Baby Warriors nga magtigi alang sa solong liderato. Ang duha parehong naghupot og 3-0 nga baraha.

Si Janjan Jaboneta maoy labing kasaligan sa opensa sa Magis Eagles lakip sa ilang bigmen nga silang Adrison Gaviola, Jose Piero Dominic Longa ug Joshua Sinclair ug Nino Araw-araw alang sa backcourt.

Ang Baby Warriors makasalig sab nilang Marc Andre Ting, Jean Jacque Antigua ug Ken John Malazarte ug uban pa.

Ang SHS-Ateneo ug USC magsangka sa alas-4 sa hapon human sa duwa sa CIT-U Wildkittens nga makiglayog sa Don Bosco Technology Center (DBTC) Greywolves sa alas-2:30 sa hapon. Sa opener, ang UV Baby Lancers makigbatok sa Cebu Eastern College (CEC) Dragons.