USJ-R, USC nagsawo liderato sa Shakey’s volley

CEBU, Philippines - Nakabahin sa solong liderato ang defending champion University of San Jose-Recoletos (USJ-R) uban sa University of San Carlos (USC) sa pool A, samtang ang Pajo National High School  (PNHS) nagsolo sa liderato sa pool B human gipilde ang host Southwestern University (SWU) sa Central and Eastern Visayas leg sa  Shakey’s Girls Volleyball League Season 12 kagahapon didto sa Aznar Coliseum.

Ang USJ-R mirehistro sa ilang ikaduhang sunod-sunod nga daog dihang  gipanitan nila ang Sacred Heart School-Ateneo de Cebu (SHS-AdC),  25-20, 25-9, samtang ang USC mikulit sab sa ikaduha nilang daog pinaagi sa pagdemolis sa University of  Southern Philippines Foundation (USPF) sa straight sets, 25-15, 25-15.

Samtang ang USJ-R ug USC miabante sa semifinals, laing  kulbahinam nga aksiyon ang masaksihan sa elimination round sa pool B.

Kini tungod kay tulo ka koponan -- ang PNHS, SWU ug Don Gerardo Ouano Memorial National High School (GOMNHS) anaa sa komplikadong sitwasyon. Ang PNHS mipakurat sa SWU, 25-13, 18-25, 25-16. Hinuon, ang SWU nakabangon ug ilang gipahimungtan ang PAREF-Southcrest School, 25-4, 25-5. Ang  GOMNHS miiskor og back-to-back nga kadaugan kagahapon. Ilang gipilde ang Minglanilla-based Mary Help of Christian School, 25-11, 25-16 ug dayon ang Southcrest, 25-8, 25-13. (BANAT PALARO)