Upat ka duwa masaksihan sa CESAFI ‘Holiday Special’
CEBU, Philippines - Tapuson karon sa Southwestern University (SWU) Cobras ug sa University of San Carlos (USC) Warriors ang ilang first round assignments batok sa tagsa-tagsa nilang kaatbang sa Holiday Special sa 14th Cebu Schools Athletic Foundation, Inc. (CESAFI) basketball tournament diha sa Cebu Coliseum.
Samtang moduwa ang ilang older counterparts, ang USC Baby Warriors mosalida sab diin nagtinguhang makigsawo sa liderato dihang ilang ikasangka ang Cebu Institute of Technology-University (CIT-U) Wildkittens.
Ang league-leading Cobras (4-0) mosuway karon pagharos sa lima ka duwa sa first round assignments sa sangka nila batok sa University of Cebu (UC) Webmasters, kinsa napilde sa ilang katapusang tulo ka duwa human sa ilang season-opening 100-96 win pinaagi sa overtime batok sa University of San Jose-Recoletos (USJ-R) Jaguars.
Sa laing bahin, ang 3-1 nga Warriors nga bag-o lang midaog batok sa UC, 74-65 sa miaging gabii, makigtakus sa Jaguars aron pormal nga mopahiluna sa ikaduhang dapit human sa first round of eliminations.
Sa sangka sa juniors division, ang Baby Warriors buot sab nga makigtabla sa Magis Eagles sa liderato sa magbitbit og 3-0 nga baraha.
Sayo karong hapon, ang 2-2 nga Junior Webmasters mosuway og bangon gikan sa kapildihan dihang harungon ang Don Bosco Technology Center (DBTC) Greywolves. (BANAT NEWS)
- Latest
