USP-F ug CIT-U daog

CEBU, Philippines- Migamit sa ilang gitas-on ug kapaspason ang University of Southern Philipines-Foundation (USP-F) Baby Panthers aron mokulit og 91-42 nga kadaogan batok sa Don Bosco Technology Center (DBTC) Junior Greywolves sa sangka sa juniors division sa nagpadayon nga 14th season sa Cebu Schools Athletic Foundation, Inc. (CESAFI) didto sa Cebu Coliseum.

Sa laing duwa, gipilde sa Cebu Institute of Technology-University (CIT-U) Baby Wildcats ang University of Cebu (UC) Junior Webmasters, 78-73 aron makigtabla sa ilang biktima sa teams standing sa parehong 2-2 nga baraha.

Ang dako nga forward nga si Niprel Carl Carbajosa maoy nangu sa Baby Panthers sa iyang 20 puntos ug midugang silang John Bryle Bahio ug Clyde Drexley Avancena og 19 ug 18 puntos matag usa samtang parehong mitikdol og 12 puntos silang John Alocillo ug Ain Obenza.

Ang Baby Panthers nakamugna karon og triple tie uban sa CIT-U ug UC samtang ang Junior Greywolves kinsa walay bisan usa ka player nga naka-iskor og double figures, mitidlom ngadto sa 0-4 nga baraha.

Sa laing duwa, giduyogan og breaks of the game ang Baby Wildcats tungod kay wala manulod ang mga tirada sa Junior Webmasters sa naghinapos na ang oras sa fourth period.

Si Jasper Berezo maoy nangu sa Baby Wildcats sa iyang 28 puntos samtang silang Justin Jules Langres ug Joshua Philip Manatad midugang og 17 ug 13 puntos matag usa.

 Si Darrel Shan Menina maoy nangu sa Junior Webmasters sa iyang 23 puntos, miambit og 16 puntos si Arvin Dungod ug may 10 puntos si Rico Quiamco, Jr. apan wala makatabang si Richestel Isla kinsa napugngan ngadto lang sa otso puntos.

Puntos matag usa:

First Game:

USP-F (Jrs.) 91 —    Carbajosa 20, Bahio 19, Avancena 18, Alocillo 12, Obenza 12, Fermin 5, Archival 2, Delos Angeles 2, Dedios 1.

DBTC (Jrs.) —       Falcone 8, Asignar 7, Dela Torre 6, Adlawan 5, Gabisay 4, Mabitad 3, Saludes 3, Agustinez 2, Macam 2, Duque 1.

Second Game:

CIT-U (Jrs.) 78 —   Berezo 28, Langres 17, Manatad 13, Faunillan 7, Abinuman 5, Plaza 4, Hapin 2, Pedroza 1.

UC (Jrs.) 73—     Menina 23, Dungog 16, Quiamco 10, Isla 8, Molina 5, Daligdig 4, Gabisan 4, Ramas 3. (BANAT NEWS)