125 mosalmot sa Phil- Asia Bodybuilding Championships 2014
CEBU, Philippines - Miabot og 125 ka mga entrante gikan sa unom ka nasud ang gikatakdang mopakita sa ilang maskulado ug pormang lawas sa 3rd Philippine Asia 2014 International Bodybuilding Championships sa Agosto 8-9 sa Mariner’s Court Convention Center.
Si Dennis Delgado, sa organizing Workout Fitness Center mibutyag nga ang labing daghan og partisipante naggikan sa Pilipinas nga adunay 78. Ang ikaduha nga labing daku nga delegasyon mao ang Morocco sa North Africa nga adunay 22 ka entrante, gisundan sa India nga adunay 15, New Zealand nga adunay unom ug Indonesia ug Malaysia nga adunay tagduha ka partisipante.
Gibutyag sab ni Delgado pinaagi sa e-mail nga gipadala ngadto sa The Freeman, ang igsuong mantalaan sa Banat News nga gawas ni reigning Mr. Universe Pro Marek Olejniczak sa Germany, si Sarah Malthus, ang women’s Europe champion, motambong sab sa maong kalihukan isip guest poser.
Kapin sa P150,000 nga ganting salapi ang giandam alang sa top performers sa duha ka adlaw nga kompetisyon.
Ang mga kategoriya nga tigian naglakip sa men’s physique, women’s shape/bikini, women’s figure, men’s masters, mixed pair and athletic, Mr. Athletic open ug novice open.
Alang sa dugang mga kasayoran, e-mail sa [email protected]. o motawag sa Workout Fitness sa 255-5531 o di ba sa 345-2395. (BANAT NEWS)
- Latest
