USJ-R batok Uc sa 2014 cesafi opener

CEBU, Philippines - Bag-ong season, bag-ong coach ug bag-ong paglaum alang sa University of San Jose- Recoletos (USJ-R) Jaguars, kinsa  kanunay usa ka contender, apan wala pa makatukob og titulo sa Cebu Schools Athletic Foundation Inc. (CESAFI) sa milabay nga 13 ka tuig.

Ang uhaw kaayong USJ-R Jaguars  moduwa batok sa University of  Cebu (UC) Webmasters sa pagbukas sa 14th season sa CESAFI karong Agosto 2 diha sa Cebu Coliseum.

Ang duwa sugdan sa alas-5:30 sa hapon human sa engkuwentro sa USJ-R Baby Jaguars ug UC Junior Webmasters.

Makita sa line-up nga dili kaayo daku’g bentaha ang USJ-R batok sa UC, apan ang deperensya  kay ang Jaguars adunay import nga si Quentin Luzoladio.

Gawas sa ilang import, ang Jaguars ubos sa ilang bag-ong coach nga si Jun Noel may tulo sab ka rookies  nga silang Jim Sandre Custan, Shann Christopher Tan ug  Ralph Dinolan.

Lain pang moduwa mao ang defending champion University of the  Visayas (UV) Green Lancers, Southwestern University (SWU) Cobras,  Cebu Institute of Technology-University (CIT-U) Wildcats ug University of San Carlos (USC) Warriors.

Moduwa sila og double round robin format sa classification phase. Ang top four moabante sa semifinals diin ang top two qualifiers makaangkon og twice-to-beat  incentives.  Ang modaog maoy magsangka sa finals sa “best-of-five” series.

Sa high school division  adunay siyam ka teams ug kini naglakip sa USJ-R, UC, Sacred Heart  School-Ateneo de Cebu (SHS-AdC) Blue Eagles, Cebu Eastern  College (CEC)  Dragons, USC Baby Warriors, UV Baby Lancers, CIT-U Wildkittens, University of  Southern Philippines (USPF) Baby Panthers ug Don Bosco Technology Center (DBTC) Greywolves.

Mosubay kini og single round robin format sa elimination. Ang highest ranked team moabante sa semifinals, samtang ang nahabilin moagi pa sa quarterfinal playoffs gawas lang sa duha nga nangiwit nga matagak na. Ang Teams no. 2, 3 ug 4 makaangkon og twice-to-beat advantage.

Usa ka double round robin format ang i-aplay sa semis diin ang top two teams mag-ilog sa titulo sa “best-of-three”  series. (BANAT NEWS)