Sunsports weekly training camp gikatakdang sugdan sa Agosto 2

CEBU, Philippines - Ang expanded basketball training camp sa Sunsport sugdan karong Agosto 2 diha sa Sacred Heart Center Sports  Club  sa dalan D. Jakosalem, ning siyudad.

Ang lima ka semana nga training camp nga bukas sa mga aspiring hoopsters nga nagpangedaron og otso hangtod sa 17-anyos, himuon matag adlaw’ng Sabado gikan sa Agosto 2 hangtod 30 diin mogahin  kini’g duha ka oras matag session gikan sa alas-12 sa udto hangtod sa alas-2 sa  hapon.

Sumala pa ni training director Giovannie ‘Jojo’ Romarate, ang tinuig nga clinic kasagaran nilang ipahigayon  sa summer, apan tungod sa hangyo sa publiko, nakahukom sila nga mohimo’g senemana nga training camp. Atol sa ilang training, ang mga partisipante mokat-on og fundamental ug technical nga aspect sa sports.

Si Romarate maoy head coach sa Salazar Colleges of Science and Institute of  Technology (SCSIT) Skyblazers.

Ang registration fee nagkantidad  lang og P1,000 libre na ang upper jersey ug Sunsport basketball 2014 edition. Sa dugang mga pakisayod, mahimong mokontak ni Romarate sa  0933-2677713/0921-2338305 o 260-8608. (BANAT NEWS)