Blue Eagles 2-0 na
CEBU, Philippines - Gipahamtangan sa Ateneo de Manila University Blue Eagles ang defending champion De La Salle University Green Archers sa ilang ikaduhang pilde ug mitidlum ngadto sa kinaubsan pinaagi sa pagkulit og 97-86 nga kadaugan kagahapon sa UAAP 77 Season didto sa Smart-Araneta Coliseum.
Si Kiefer Ravena maoy nangu sa Blue Eagles dihang miposa siya'g 29 puntos nga naglakip sa upat sa iyang lima ka three-pointers didto sa fourth quarter aron tabangan ang iyang team nga maghupot og 2-0 nga baraha.
Ang Best Player of the Game hinoon mao si Alfonso Gotladera, ang batan-ong starting center nga gikan sa San Beda high school ni kanhi coach Britt Carlo Reroma.
Wala lang molampos pagdepensa kanilang Norbert Torres ug Arnold Van Opstal, midugang pa gyud siya'g 17 puntos ug may walo ka rebounds alang sa Ateneo.
Maayo sab nakaduwa si Von Pessumal kinsa mibahug og 21 puntos alang sa Blue Eagles ug ang rookie nga si Arvin Tolentino mihimo sa labing una niyang double-double sa iyang UAAP career sa iyang 14 puntos ug 10 ka rebounds.
Ang La Sallee kinsa maoy kanunay nag-una halos sa kinatibuk-ang first half, miapas didto sa fourth quarter apan kalit lang nag-igo si Ravena gikan sa three-point area diin ang iyang sagunson tulo ka triples naghatag kanila'g 70-66 nga bentaha ug dayon ang jumpshot ni Tolentino maoy naghatag sa Ateneo og 75-66 nga abante.
Ang kinadak-ang labaw sa Ateneo miabot ngadto sa 14 puntos ug wala na kini maapas pag-usab sa La Salle bisan pa og kanunay silang mohulga pagsikit.
Si Jason Perkins maoy nangu sa La Salle sa iyang 25 puntos uban sa 10 ka rebounds ug upat ka assists. Midugang silang Almond Vosotros ug Jeron Teng og 18 ug 15 puntos.
Samtang 2-0 na ang Ateneo human sab sila modaug batok sa Adamson University Soaring Falcons, midailos ngadto sa kinaubsan ang La Salle sa 0-2 nga baraha kay pilde man sab sila sa Far Eastern University (FEU) Tamaraws. .
Puntos matag usa:
Ateneo 97 – Ravena 29, Pessumal 21, Gotladera 17, Tolentino 14, Elorde 9, Newsome 7.
La Salle 86 – Perkins 25, Vosotros 18, Teng 15, Van Opstal 10, Torres 8, Rivero 4, Andrada 2, Salem 2, Sargent 2.
Quarters: 17-24, 39-27, 61-59, 97-86. (BANAT PALARO)
- Latest
