Casimero misaad og daog
CEBU, Philippines - Mipasalig si IBF light flyweight champion Johnriel 'Quadro Alas' Casimero (19-2, 10KOs) nga magpabiling kampiyon sa gikatakda niyang title defense batok sa mandatory challenger nga si Mauricio Fuentes (16-2, 10KOs) sa Mayo 3 diha sa Waterfront Cebu City Hotel and Casino.
Matud ni Casimero, nga sama sa una niyang mga title defense, iyang ihatag ang tanan aron magpabilin sa iyang kamot ang bakus.
"Nindot akong training alang aning awaya," matud pa sa garbo sa Ormoc City. "Sa pagka karon makaingon ko nga andam nako batok niya (Fuentes), maningkamot ko nga modaog impressively."
Ang 22-anyos nga si Casimero lab-as pa sa iyang 11th round TKO nga kadaugan batok ni Mexican challenger Felipe Salguero niadtong Oktubre sa miaging tuig didto sa Makati Coliseum.
Si Casimero ikatulo sa mga nahibiling world champion sa nasud sunod nila ni WBO welterweight king Manny Pacquiao ug WBO light flyweight title-holder Donnie Nietes.
Sa iyang bahin, ang trainer ni Casimero nga si Pingping Tepora mitug-an nga lisud nga sangka ang atubangon sa iyang batos. Apan daku ang pagsalig nga modaog gihapon ang iyang boksidor.
"Lisud ni ang Colombian kay mandatory challenger siya, pero sakto si Johnriel sa training ug daku ko'g salig niya," matud pa ni Tepora nga nahinabi sa Banat News. (BANAT PALARO)
- Latest
