As-Es B.A.R. Finals himuon karong gabii

CEBU, Philippines -  Magpinaksitay na ang magkaribal – ang Team Alcover ug ang Team Bastida dihang mag-ilog kini sa titulo sa As-Es B.A.R. First Conference basketball tournament karong gabii diha sa Benjamin Solon Memorial Gym sa Cogon Ramos, Cebu City.

 Ang duwa sugdan sa alas-8 sa gabii.

 Sa dili pa ang kampiyonato, magsangka una ang Team Lim ug Team Endab alang sa ikatulong puwesto nga sugdan sa alas-6:30 sa gabii.

 Nakuha sa Team Alcover ug Team Bastida ang mga lingkoranan sa finals human  nila gitagak ang tagsa-tagsa nilang kaatbang atol sa crossover semifinals.

 Unang nakasud sa finals ang Team Alcover human gipilde ang Team Endab, 92-79, samtang ang Team Bastida mipukan sa Team Lim, 93-86.

 Ang Team Alcover magsandig gihapon sa ilang mga sinaligan nga silang Gerald Ylaya ug Randyll Roncal, samtang itugyan sab sa Team Bastida ang ilang pagsalig ngadto nilang Louie Tanggol, Reynolds Zamora ug Rocky Bacalso.

 Human sa duwa, isunod dayon ang awarding ceremony diin si Noel Godiz mohatag sa iyang opening message.

 Si Cebu City Mayor Mike Rama ug Vice Mayor Edgardo Labella gilauman nga motambong ug mohatag og inspirational message ngadto sa mga mananaog.

 Gawas nilang Mayor Rama ug Vice Mayor Labella, mohatag sab sa ilang mensahe silang Adlaon  barangay captain Elvis B. Narra, Cogon Ramos barangay captain Omar D. Durano Sr. ug Cogon Ramos barangay councilor Rudy C. Rubi. (BANAT NEWS)