Exciting pa ba?
Aminado ko nga nakuwangan ko sa performance ni Manny Pacquiao niadtong Domingo dihang iyang gikulata ug gibawi ang WBO welterweight belt gikan kang Tim Bradley.
Kini tungod kay wa man niya ma-knockout ang Amerikano bisan pa sa pasiatab sa iyang kampo nga mas agresibo ug ang karaang Manny ang mosaka sa ring nianang adlawa.
Wala ko matagbaw niadto kay di ang karaang Pacquiao ang akong nakita. Kay naanad man gud ko ug bisan na ang boxing fans nga ma-KO gyud ang iyang makaatbang, ilabi na ang susama lang og kalidad ni Bradley.
Apan duna ko'y nakita nga kausaban kang Pacquiao, samtang wala mawala ang iyang footwork ug volume punches, mas nahimo siyang "mature" sa iyang mga lihok karon. Kadtong Pacquiao nga tiwasan ang kontra, wala na.
Diha nako na-recall nga sa nanglabay nga mga interbiyu sa gibansagang Pambansang Kamao, siya miingon nga mas mahimo siyang agresibo ug kuwang na lang moingon siyang wala na kinahanglana pa ang hurado. Apan curiously, mipasupot man siya pag-ingon nga kun duna may knockout "bonus" na lang kini. Sa akong pagsabot, duha maoy kahulogan niini.
Una, iyang tumbahon si Bradley sa bisan kanus-a nga round. Ning paagiha mapakita niyang wa mawala ang iyang "knocking power" ug di na mo-matter pa ang scorecards sa judges.
Ikaduha, paulanan niya og kinumo si Bradley ug palabwan kini sa scorecards kay wa gyud siya'y planong ma-KO kini, apan kun magpatara si Bradley makuha niya ang "bonus." Meaning, di gyud siguro ang KO.
Hinuon, bisan unsa pa may outcome, makaingon ta nga susama karon ang dinuwaan ni Pacquiao sa karibal nga si Floyd Mayweather Jr. Modaog nga way grabeng bun-og, total parehas ra man og premyo ba.
Mas makaayo kini sa iyaha ug sa iyang pamilya. Kay kun moabot ang panahon nga moretiro siya, wala kaayo'y "damages" nga ibilin sa iyang lawas ang iyang pagpamuksing ug himsog niyang ma-enjoy ang iyang hinagoan. Wise ba.
Apan kun ingon niini na gyud ang iyang buhaton sa mosunod pa niyang mga sangka (two fight pa daw) makapangutana ta, exciting pa ba kaha kun abuton silang duha ni Mayweather?
Happy Easter Sunday sa tanan.
* * *
PAGTULON-AN: "For to be free is not merely to cast off one’s chains, but to live in a way that respects and enhances the freedom of others."– Nelson Mandela, kanhi presidente sa South Africa
- Latest
