Pacers balik No. 1

CEBU, Philippines - Nailog na sab sa Indiana Pacers ang liderato sa Eastern Conference human sa ilang kadaugan batok sa Oklahoma City Thunder, 102-97 sa ilang duwa sa NBA kagahapon didto  sa Banker’s Life Fieldhouse sa Indianapolis.

Usa na lang ka daog kinahanglan sa Pacers aron  mahimong topseed sa East atol sa playoffs.

Unom ka players sa Pacers ang miiskor og double figures nga gipangulohan ni David West, kinsa  miposa'g 21 puntos. Si Lance Stephenson midugang og 17 puntos uban ang 11 ka assists ug 10 ka rebounds alang sa iyang ikalimang triple-double.

Iyang naapsan ang franchise record sa Pacers nga gihimo ni Detlef Schrempf sa iyang upat ka triples-double sa usa lang ka season niadtong 1992-1993.

Sa laing duwa, ang Portland  TrailBlazers midaog batok sa Golden State Warriors,  119-117  sa overtime bisan pa sa 47 puntos ni Stephen Curry.

Ang maong sangka nagpakita og 16 ka lead changes ug siyam ka tabla.

Ang Blazers na karon maoy fifth seed sa Western Conference.

Sila maoy makigsangka batok sa No. 4 nga Houston  Rockets sa playoffs.  Kinahanglan nga  modaog og kausa ang Rockets aron  ilang makuha ang homecourt advantage.

Midaog sab ang Toronto Raptors batok sa Detroit Pistons, 116-107, ang New York Knicks miihaw sa  Chicago Bulls, 100-89, gipilde sa Brooklyn Nets ang Orlando Magic, 97-88  ang Sacramento Kings naka-eskapo bitbit ang  106-103 nga kadaugan batok sa Minnesota Timberwolves ug   ang Memphis Grizzlies midaog batok sa L.A.  Lakers, 109-90. (BANAT NEWS)