Adlaw sa paghukom
LAS VEGAS - Pipila ka oras gikan karon atubangon na ni Filipino ring star Manny Pacquiao (55-5-2, 38KOs) ang labing krusyal niya nga away sa iyang boxing career dihang iyang hagiton si undefeated WBO welterweight champion Timothy Bradley (31-0, 12KOs) sa ilang "rematch" sa Sabado sa gabii (Domingo sa buntag oras sa Pilipinas) didto sa MGM Grand Garden Arena.
Ang 35-anyos nga si Pacquiao mitikang sa arena uban ang daghang mga butang nga ipamatuod -- nga siya ang tinuod nga midaog batok ni Bradley atol sa ilang unang sangka diin iyang gidominar ang away duha na ka tuig ang nakalabay didto gihapon sa MGA Grand ug ang labing importante -- nga ang kaniadto ug makalilisang nga Pacman tinuoray mobalik.
Sa una nilang engkuwentro niadtong Hunyo 2012, si Pacquiao midaog ni Bradley sa tanang round, apan napilde kini pinaagi sa kwestiyonabling split decision. Daghang mga tigpaniid ang nahingangha kay sa ilang pagtuo, ang fighting congressman gikan sa Sarangani Province ang angay untang hatagan sa daog.
Gawas sa iyang kabantog ug high market value sa Estados Unidos, si Pacquiao mao sab ang inilog sa mga sugarol didto sa Sin City nga modaog sa ikaduhang sangka.
Atol sa official weigh-in kagahapon, si Pacquiao mitimbang og 145 lbs., samtang si Bradley mas bug-at og tunga sa libra, nagpamatuod kini nga andam na sila sa ilang sangka.
Sa maong away, si Pacquiao modawat og $20 million, samtang $6 million ang mabulsa ni Bradley.
Mao kini ang unang higayon nga si Pacquiao moaway alang sa titulo nga iyang nahuptan kaniadto.
Nangahas si Pacquiao nga mo-"knockout" ni Bradley, apan kadudahan pa kini. Rason niini mao ang wala na siya moiskor og "knockout" sukad sa iyang last round TKO ni Miguel Cotto niadtong 2009. Wala sab siya makatumba ni Brandon Rios niadtong Nobiyembre sa miaging tuig didto sa Macau human sa makaangkon og sunod-sunod nga kapildihan ngadto ni Bradley ug Juan Manuel Marquez.
Ang 30-anyos nga si Bradley mismo miingon nga wala nay "killer instinct" ang kanhi eight-division world champion nga si Pacquiao.
Si Bradley misaad nga iyang tumbahon si Pacquiao aron mahilom ang iyang mga kritiko.
Karong adlawa kinahanglan nga mohimo'g impresyon si Pacquiao tungod kay ang iyang karera maoy isugal.
Ang kapildihan magpasabot nga mao na ang iyang katapusan, samtang ang daog maghatag kaniya og bag-ong paglaum nga mogiya alang sa fifth match uban ni Marquez o ang dream showdown ni Floyd Mayweather Jr. (BANAT NEWS)
- Latest