UV Lancers nangandam sa 2014 Filoil Flying V Cup

CEBU, Philippines - Daku na sab nga  misyon ang sagubangon sa 2013 CESAFI champion University of the  Visayas (UV) Green Lancers  sa dihang mosalmot kini sa 2014 Filoil Flying V Hanes Premier Cup  basketball tournament sa Abril 23 didto sa Filoil Flying V Arena sa San Juan City.

 Kini ang gipahibalo ni UV Lancers team manager Gerald Anthony 'Samsam' Gullas Jr. atol sa press conference kagahapon didto sa iyang butahan sa UV.

 Usa lang ang UV Lancers sa upat ka teams sa Sugbu nga mopakita'g aksiyon sa maong torneyo.

 Adunay 19  ka  teams  ang mosalmot ug gibahin kini ngadto sa tulo ka brackets. Ang UV Lancers nabutang sa bracket uban  Southwestern University (SWU) Cobras, University of San Carlos (USC) Warriors, University of the East (UE) Red Warriors, Jose Rizal University (JRU) Heavy Bombers, Mapua Institute of Technology (MIT) Chirping Cardinals ug 2013 UAAP champion De La Salle University (DLSU) Green Archers.

 Ang lain pang mga teams naglakip sa San Beda Red Lions, San Sebastian Golden Stags, UST Growling Tigers, Letran Knights, NU Bulldogs, Perpetual Help Altas, FEU Tamaraws, EAC Generals, Lyceum Pirates, St. Benilde Blazers, Adamson Soaring Falcons, UP Fighting Maroons, RP Youth U17, CEU Scorpions ug Holy Trinity Wildcats sa General Santos City.

 "We expect to be competitive. We also want to show that our talents is not only good for Cebu but also on the national stage. We want to be competitive but we also want to win as well,"  matud pa ni Gullas.

 Sa iyang bahin, si UV Lancers coach Felix 'Donbel' Belano nagkanayon nga wala siya mabalaka sa iyang team karon bisan og daghang rookies.  Miangkon sab siya nga padayon pa siyang nag-formulate og saktong chemistry alang sa iyang team.

 Ang Lancers mao sab ang morepresentar sa Sugbu sa National PRISAA sa unang semana sa Abril didto sa Tagum City, Davo Oriental.