EDITORYAL - Dignidad sa OFW

Daghang Overseas Filipino Workers (OFW) didto sa nasud sa Kuwait ang makaluluoy ang kahimtang tungod sa mga pag-abuso sa ilang mga employers. Gani, ang uban kanila migamit na sa social media aron ipakita ang aktuwal nga pagyatak sa ilang dignidad.

Ang kadaghanan kanila mga babaye nga nanimpalad para sa ilang mga pamilya kay dinhi sa nasud wala’y kaugmaon ug oportunidad nga nagpaabot kanila. Nagsakripisyo sila sa laing nasud para mapakaon, mapaeskuyla ang ilang mga anak ug mahatagan sila og kaugmaon tungod kay lisud kaayo kining makab-ot dinhi sa ato.

Karon si Presidente Duterte mihulga nga iyang papaulion ang mga OFWs gikan sa Kuwait ug mopatuman siya og total deployment ban sa maong nasud. Apan gihangyo ni Duterte ang China nga dawaton ang mga OFWs nga mawagtangan og trabaho didto sa Kuwait.

Tinuod, maayo ang relasyon karon sa duha ka nasud, apan makasiguro ba kaha ang gobiyerno kon mas maayo ang pagtratar unya sa mga OFW kon adto sila manarbaho sa China? Niadtong panahon sa kampanya, misaad si Duterte nga wala na’y mga Pilipino nga mogawas sa nasud aron manarbaho, apan hangtud nga dili niya mahitsas ang mga problema dinhi sa nasud, mura’g ang iyang saad madugay pa nga kahatagan og katumanan.

Dili makaako ang usa ka amahan, inahan, o anak nga makakita sa ilang mga minahal sa kinabuhi nga mamatay sa gutom ug magsiga ang mata, mao nga magpadayon ang paglarga sa mga Pilipino sa ubang mga nasud aron masuportahan ang ilang mga pamilya.

Apan ayha pa unta si Duterte modeklarar og total deployment ban, ug papaulion ang tanang OFWs gikan sa Kuwait kon may kabalhinan na sila sa pagtrabaho, ug tabangan unta niya ang mga giabusohan didto. Isip pangulo, siya unta mismo maoy moawhag sa mga lider sa maong nasud nga panalipdan ang katungod sa mga OFW.