Unsa’y bation kon 3 ka itlog kaonon (2)

Ang kolesterol sa itlog dili sama sa kolesterol nga LDL (low density lipoprotein), nga makapabara sa agianan sa dugo. Sa HDL, ilampaso hinoon ug hilison ang nakapabara sa agianan sa dugo aron dili mabalda ang sirkulasyon.

Sa ingon, masanta ang sakit nga aterossclerosis, ug i-normal niya ang lebel niini ug makatabang nga masanta ang posibleng stroke ug atake sa kasingkasing.

Girekomendar ang pagkonsumo sa itlog, gikan sa usa ngadto sa labing daghan tulo ka buok, kada adlaw. Niini, makatabang sab sa pagkontrol sa diabetes.

* Proteksyon sa mata —  Ang itlog nagbaton sab og ‘lutein’, ang tipo sa ‘carotenoid’ nga motabang sa pagsanta sa ‘macular degeneration’, nga sagad maoy hinungdan sa pagkahalap o pagkabuta. Ang pughak (egg yolk) aduna sa’y zeaxanthin nga moprotehir sa makadaot nga silaw sa adlaw.

* Pahimsog sa kabukogan — Ang vitamin-D sa itlog, importante sa calcium nga makatabang sa pagpatuhop niini sa bukog aron mohimsog. Kon menus ka niini, kalagmitan dako ang risgo nga masakit og osteoporosis.

* Iron — Ang itlog maoy maayo kon kulang kita sa iron, nga esensyal nga elemento ning makatabang sa pagprodyus og pulang dugo, diin mao kini ang magdala sa oxygen ngadto sa mga tisyu sa atong baga. Busa kon magluya ta, tungod kay kulang sa dugo, ang itlog igo na nga maoy makahatag nato og kusog o kabaskog sa lawas.

* Pahimsog sa utok —  Dasok sab ang itlog sa ‘choline’,  ang elemento nga maoy modebelop sa maayo nga pangutok. Mas makaayo ni sa babayeng mabdos, kay ang gisabak, hulmahon niini ang utok nga madebelop nga himsog. Sagad sa mga mabdos, kulang sa iron kay nabahin ngadto sa gipanamkon, busa itlog ra’y solusyon.