Paint party delikado

Nagbunga og maayong resulta ang estrikto nga pagpatuman sa mga lagda sa Cebu City government atol sa Sinulog 2018, ilabi na ang pagdili sa mga ilimnong makahubog duol sa parade route.

Wala’y mga palahubog nga napaslak sa giandam nga mga karaang Kaoshiung buses, tungod tingali kay wala may mga establisemento nga namaligya og bino.

Hinuon, adunay pipila ka mga tindahan nga gipaubos sa pakisusi kay kuno misupak gyud sa kamandoan ni Mayor Tomas Osmeña.

Nasayod na sila sa ilang kapalaran kon wala gyud sila motuman, aw sirad-an.

Bisan og nagdasok ang mga tawo sa kadaghan nga halos dili na makairog kon molakaw ka sa kadalanan, wala man usa’y nahitabo nga disgrasya.

Wala’y mga street party, mao nga wala kaayo mogara ang mga tawo sa pagsaba- saba. Makita nato nga napatigbabaw gyud ang sentro sa selebrasyon nga mao ang Señor Sto. Niño nga mao ang gusto nga mahitabo sa mayor.

Nahimo man lagi kini karon nga pwede diay mag-celebrate sa Sinulog nga dili magmugna og kahasol ug kasamok. Unta, ingon na niini ang mahitabo sa umaabot pa nga mga Sinulog celebration.

Apan gawas sa bino, mas maayo tingali nga did-an sa siyudad ang gitawag sa mga tawo, ilabi na sa mga batan-on, nga paint party.

Pastilan maglakaw ka sa dalan, ilabi na inighuman sa parada, kalitan lang ka og pahid og pintal sa nawong.

Maayo lang kon pintal ra nga water based, apan ang uban magkuha og pintal nga dili na matangtang, naa usa’y mokuha og anuos sa tambutso sa mga sakyanan kay ipahid sa nawong sa uban.

Kini ang mohaling og kagubot kon masubrahan, kay naay daghan nga dili gusto mahugaw-hugawan. Gani hapit diay magkakarambola ang magkaatbang nga grupo niadtong gabii sa Sinulog tungod niining pagpangsabyag og pintal.

Mas maayo nga did-an na kini aron dili makamugna og problema.