Kinahanglang estrikto gyud

Midayeg ko sa gihimo sa mga magpapatigayon nga nahimutang sulod sa 300 metros nga gilay-on gikan sa rota sa Sinulog Grand Parade dinhi sa dakbayan sa Sugbo kaniadtong Domingo.

Gituman nila ang mando ni Mayor Tomas Osmeña nga dili mamaligya og ilimnong makahubog atol sa mao nga kalihokan, kay kon moinsister sila, sirad-an ang ilang negosyo sulod sa unom ka buwan.

Unya, bahad ni Osmeña nga kadtong masakpang nag-inom ug ilimnong makahubog, dakpon ug ipaslak sa karaang Kaoshiung bus nga maoy gihimong temporaryo nga prisohan.

Tuod man, walay kagubot nga nahitabo kay wala ma’y mga hubog, sama kaniadto nga maglakaw-lakaw nga magbitbit og baso, ingon man botelya sa mga beer, ang mga tawo diha sa rota sa Sinulog.

Kaniadto, lisud na nimo nga mabadlong ang mga hubog kay ang mga tigpatuman sa balaod magpanagana sa pagduol kay mga anak man sila og iladong mga banay.

Tan-aw lagi nako sa mga hinginom, minghoy. May naagian ko sa Junquera Street nga mga lalaki nga diha daplin sa karsada, nagduda ko nga ang sulod sa ilang plastik nga sudlanan, beer, apan mga edaran man og pormal ang lihok, samtang nagsultihanay.

Wala man did-i ang mga tawo sa pag-inom, ingon man gitugot man sab ang pagbaligya og ilimnong makahubog, pero adto sa layo sa rota sa Sinulog. Maayong himoon gihapon kini sa sunod tuig.

* * *

Nakabantay ko nga pwerteng hugawa gyud sa atubangan sa Cebu City Hall kay ang mga tawo nga diha nagpahimutang samtang naminaw sa misa, nagpataka na lang paglabay sa ilang mga sagbot.

Grabe gyud kahugaw. Kang kinsa man kini nga sipyat? Hala, kamong mga opisyal sa City Hall, kamo na la’y paghinuktok kon kinsa ang angay’ng basulon niini.

Giyama-yamaan na lang ang City Hall grounds. Bisan ang atubangan sa City Hall, pwerteng hugawa gyud.

* * *

Buyno, human na ang pagsaulog nato sa kapistahan ni Señor Santo Niño. Ambot, kamo, nikuyog ba mo sa procession? Kaniadtong Sabado, gituman na usab nako ang akong panaad nga mokuyog sa solemn procession ug dili mahadlok kon mouwan.

Samtang nagpayong ang kadaghanan kay mahadlok nga mabasa, ako nagpatuas ra sa uwan. Nangandoy ko nga mobunok ang kusog gyud nga uwan aron masuta kon kinsa kadtong mga tawo nga kinasing-kasing gyud ang pagkuyog sa procession.

Panaad nako kini kay usa ka sakop sa akong pamilya, nakasinati og grabeng dengue kaniadto, ug gisaad nako kang Santo Niño nga tungod sa iyang tabang nako, magsakripisyo ko pagkuyog sa procession matag bisperas sa iyang kapistahan, ug kon mag-uwan o magbagyo man, magpatuas ra ko sa uwan.