Gi-target si Bong Go

Duha lang ka butang akong mahunahunaan niining pasangil nga si Special Assistant to the President Bong Go giingong mi-interbener sa combat management system (CMS) project alang sa usa ka barkong igugubat (frigate) sa Philippine Navy.

Una, nagtuo ko nga “smokescreen” kini sa kampo ni kanhi presidente Noynoy Aquino nga malili-an ang binuang nila sa pag-award sa CMS project sa Hyundai Heavy Industries.

Ikaduha, paagi kini sa paglubog sa proyekto sa mga interesadong grupo nga wala ganahi sa kapildehan kon dili ma-award kanila ang CMS project.

Kining maong P15.7 bilyones nga frigate acquisition project ubos sa AFP Modernization Act gisugdan og hikay sa administrasyong Aquino. Apan nakadaog sa bidding mao ang Hyundai sa South Korea ug na-award kini sa administrasyong Duterte niadtong Agosto 18, 2016.

Apan nalubog kini tungod sa matud pa usa ka “white paper” nga nadawat ni Bong Go nga iya usab gihatag ngadtong Defense Secretary Delfin Lorenzana. Kining maong papel nagsaway sa “choice” sa Philippine Navy nga ang CMS sa frigate paliton sa Thales Tacticos nga usa ka Dutch nga kompaniya. Si Lorenzana mitunol sa papel kang kanhi Navy Flag Officer in Command Ronald Joseph Mercado.

Sumala sa balita nga usa ka semana human sa pagtunol sa papel, ang kanhi right hand ni Bong Go nga si kanhi PMS Undersecretary Christopher Lao misulat sa Frigate Project Technical Committee chairman (niadtong higayona) Commodore Robert Empedrad ug giimbitar sa Malacañang aron tukion ang CMS project.

Kini maoy gigamit sa mga kritiko sa administrasyon nga ebidensiya nga si Bong Go miinterbener kuno sa transaksyon sa Philippine Navy. Ang mga oposisyon sa Senado misang-at na usab og resolusyon aron paimbestigahan ang frigate project sa Philippine Navy. Napud!

Ulahi na kaayo kita sa ubang nasud sa Asya kon ang mga kahimanan sa depensa sa atong kaugalingnan na ang hisgotan. Wala pa gyud kitay barkong igugubat nga ikasakbang sa mga barkong igugubat sa ubang nasud, ilabi na ang China. Unya dili na kita suod sa Amerika.

Para nako, kon makalangay lang og samot sa pagpalit sa frigate sa Philippine Navy kining pagpa-imbestigar sa Senado, maayong wala na lang.

Dili ba kaha tinguha kini sa mga interesadong grupo nga mapalpak si Presidente Duterte sa iyang tinguha karon nga modernisasyon sa Armed Forces of the Philippines? Wala ko’y gihinganlan, apan posibleng ang kampo ni Aquino o mga interesadong grupo, apil na kadtong nahadlok nga dili makasakay sa bahin sa komisyon.

Dili lisud nga target si Bong Go kay sama kini kahilomon sa mga patay sa menteryo. Kon ma-target si Bong Go, apil og kaigo si Duterte kay “trusted assistant” niya kini.

Busa, hunonga na intawon kining laing panglubog kay ang AFP na ang madamay nianang kalakiha.