Maayo ang kabag-ohan!

Kasaysayan alang sa mga Oponganon ang paglakip kanila sa kapistahan ni Señor Sto. Niño diin sa ilang siyudad nanukad ang fluvial procession, sukwahi sa nanglabay’ng panahon nga sa dakbayan sa Mandaue.

Gipamatud-an sa mga Oponganon ang ilang paghangop sa Balaang Bata diin mokabat sa 150 mil ka deboto ang misugat.

Nagpakita kini sa kauhaw sa mga taga isla nga sa taas nga panahon sa daplin lang sa dagat o sa tulay maglantaw kay kutob ra man sa Mandaue ang imahen kaniadto.

Matud sa mayor sa dakbayan sa Lapu-Lapu nga tanang barangay ang miapil, lakip ang mga island-barangays nitabok sa mainland, aron masud-ong ang Batang Hesus.

Nasaksihan kini nako sanglit ang mga karsada nahisama sa bawod sa mga tawo nga miwara-wara sa ilang mga kamot ngadto kang Señor Sto. Niño.

Samtang daghan usab ang nakasakay sa “galleon” sa Philippine Navy, itandi kaniadto sa yate nga gipanag-iya sa usa ka pamilya sa Mandaue.

Para nako maayo ang kausaban nga gipatuman sanglit ang Batang Hesus alang man sa tanan ug dili lang “exclusive” sa uban. May gamay lang nga negatibong reaksyon ang ubang deboto sa pag-limit sa mga tawo nga makasulod sa simbahan kay setting capacity lang kuno ang gitugot.

Nakasabot man ko nga tungod sa seguridad gipatuman ang sistema, apan luag pa man ang sulod ug pwede ra gyud kasudlan.

Sa kinatibuk-an, malinawon ang kalihokan sa Sinulog 2018.