Bag-o na ang LTO regional director

Karong semanaha, gikatakda nga moanhi sa Sugbo ang labaw’ng opisyal sa Land Transportation Office (LTO) nga si Assistant Secretary Edgar Galvante.

Sa maong adlaw, pormal usab nga ipahibalo ni Galvante nga bag-o na ang regional director sa LTO-Central Visayas. Si Vic Caindec maoy napilian sa kadagkoan sa Department of Transportation (DOTr) nga ipuli ni Alita Pulga, ang acting regional director sa dugay’ng panahon.

Kon molingkod na si Caindec isip labaw’ng opisyal sa LTO-Central Visayas, si Pulga molingkod isip iyang pangabaga, kun assistant regional director. Pulos nako mga higala sila si Pulga ug Caindec.

Diha nga nagkakuyog mi pagsakay sa eroplano gikan sa Davao City paingon dinhi sa Sugbo, duna siya’y gitug-an kanako nga nakaingon ko nga tarong nga pagkatawo kini si Caindec.

Ang tinuod, dili si Caindec maoy girekomendar nga LTO regional director nila ni Secretary Adelino Sitoy ug Presidential Assistant for the Visayas Michael Dino. Usa ka abogado nga taga Cordova maoy girekomendar nila ni Dino ug Sitoy sa maong pwesto.

Apan si Caindec maoy gitudlo sa pagka regional director sa LTO-Central Visayas kay suod kaayo sila si Presidential Special Assistant Bong Go. Karon, makapaabot kita og kalamboan sa kampanya batok sa mga badlungong driver nga bag-o na ang director sa LTO.

Naglaum lang ko nga wala unta mausab si Caindec sa iyang batasan nga ipatigbabaw gayud ang kampanya batok sa mga binuang.

* * *

Nakadungog ko nga mura’g bisitahan nila ni Galvante ang bag-ong LTO-Mandaue City district office nga anaa mahimutang sa JCenter Mall sa Barangay Bakilid, Mandaue City ug sa Robinson’s Fuente.

Maayong makabisita usab si Galvante dinhi sa Sugbo, kay dugay na mi nga wala magkita. Alang sa mga wala pa mahibalo, usa ka heneral sa kapolisan si Galvante kaniadto, ug mag-arian siya sa Sugbo, uban ni kanhi PNP Chief Ping Lacson.

Pangutan-on nato si Galvante kon unsay mga kausaban sa LTO nga gusto nilang ipatuman aron mapanton ang mga badlungong driver. Basin og makapangita na og lugar ang LTO-regional office nga adto sila magpahimutang, kay ang ilang opisina diha sa Natalio Bacalso Avenue, pwerteng gamaya ug maghuot ang mga tawo.

Maayo gani kay gipabuksan ni Pulga ang mga LTO satellite offices sa mga dagkong mall, sama diha sa Robinson’s Fuente ug JCenter Mall. Basin og ubos sa pagdumala ni Caindec, dugang mga satellite offices sa LTO ang iyang paablihan aron dili na gyud maghuot ang mga tawo nga moanha sa LTO region.