Pagsabot gyud mo

Tukma kaayo ang awhag ni Mayor Tomas Osmeña ngadto sa katawhan nga kinahanglang ang pamilya duna gyu’y contingency plan kay aron nga kon pagngon gani ang signal sa cell sites, magkakitaay ra gihapon ang grupo.

Posible man gud nga pagngon lang pagkalit sa mga telecommunications network ang signal sa ilang cell sites tungod sa awhag sa kapolisan nga gipaagi sa National Telecommunications Commission. Gikabalak-an nga ang signal sa cellphone, gamiton sa mga tawo aron pagpaulbo og bomba.

Ang paagi mao nga magsabot ang mga sakop sa pamilya nga kon wala na’y signal ang cellphone, magkita sila sa usa ka lugar sa mao nga oras. Pananglit, alas utso ba sa gabii anha sila magtagbo atubangan sa dakong tindahan sa Fuente Osmeña.

Sa ato pa, bisan og wala pa’y signal ang cellphone, magkakita ra gihapon. Ingon man niini ang gihimo kaniadto nga wala pa mauso ang mga cellphone, apan ang mga batan-on karon nagsalig na lang sa gadgets.

* * *

Buyno, kinahanglang motabang kita pagbantay nga wala’y mosupak sa kamandoan sa mayor, bahin sa pagbaligya og mga ilimnon nga makahubog sulod sa 300 metros gikan sa karsada nga subayon sa mga Sinulog contingents.

Dili kay baligya ra ang gidili sa mayor, apil ang pag-inom og mga makahubog nga ilimnon. Teksi ninyo ang mayor sa iyang numero, 0917-3299999, ug mahimo sab diri nako, 0943-0766611.

Daghan ang nangutana kon gidili ba gyud ang inom sa tibuok siyudad? Kadtong lapas na sa 300 metros gikan sa rota sa Sinulog parade, mahimo ra nga moinom, apan kon moadto mo sa dapit nga tua gihimo ang Sinulog parade, ayaw gyud paghinubog.

Kadtong maghimo og kagubot, sigurado nga mapaslak gyud sa karaang Kaoshiung bus nga maoy himoong temporaryo nga bilanggoan.

* * *

Unya, kon mahimo, ayaw gyud kamo paghurot sa pagpanglakaw kon ang inyong balay sayon ra nga masulod sa mga kawatan. Nakasuway na ko mga upat ka tuig na ang milabay nga gisaka ang akong balay og kawatan.

Maayo gani kay bata ra nga anak sa among silingan ang misulod kay kuwarta ra ang gikuha. Gisulod na unta sa sako ang printer sa akong computer, apan gibiyaan pagkakita sa kuwarta diha sa akong hunos.

Magpasalamat na lang ko nga gibilin gyud tawon ang pipila ka mahinungdanong butang, ug kuwarta ra gyud ang gidala. Gikan niadto, nagmatngon na gyud ko ug mihimo na og mga paagi.