HRW report

Siguradong manglupad na ‘sab ang balikas gikan ni Presidente Rodrigo Duterte tungod niining labing awahing report gikan sa New York-based Human Rights Watch diin gihulagway ang Pilipinas nga nakasinati kuno sa labing ngil-ad nga crisis paglapas sa tawhanong katungod sukad mapukan ang diktadoryang rehimin ni Ferdinand Marcos.

Basi sa World Report 2018 sa HRW nga grabi kuno ang human rights violations dinhi sa Pilipinas ubos sa administrasyon ni Duterte. Gitumbok ni Phelim Kine, deputy Asia director sa HRW, ang dugoon nga kampanya ni Duterte batok sa illegal nga drugas ug ang iyang pagpanglutos sa mga sakop sa media nga kritikal sa iyang gobiyerno nga maoy mga hinungdan nganong iyang gihulagway nga nasinati sa Pilipinas ang “worst human rights crisis.”

Matud ni Kine nga basi sa talaan sa kapolisan moabot sa 4,000 ka mga kinabuhi ang nakalas tungod sa kampanya batok sa drugas. Ang maong gidaghanon posible pa kuno nga moabot sa 12 mil kon ilakip pag-ihap ang mga patay nga giingong binuhatan sa mga vigilantes.

Luyo niining maong mga kaso sa patay, gitumbok sa report nga nagmagahi ang gobiyerno sa pag-imbistigar. Hinuon pulos balikas maoy tubag ni Duterte sa maong mga nanawagan. Gani ang UN special rapporteur nga si Agnes Cullamard wala man makalingkawas sa mga balikas ni Duterte.

Apil sab sa gihisgutan sa report ang labing uwahing kamanduan sa Securities and Exchange Commission nga sirad-an ang online news platform nga Rappler tungod kuno sa paglapas sa batakang balaod nga nagdili sa mga langyaw pagpanag-iya og media company.

Nasuta nga usa sa mga investors sa Rappler mao ang Omidyar Network usa ka langyaw nga kompaniya nga gipanag-iya sa founder sa eBay nga si Pierre Omidyar. Gipasabot hinuon sa Rappler nga bisan ni-invest ang Omidyar pinaagi sa Philippine Depositary Receipt apan wala ni labot sa pagpadagan sa kompaniya.