Kinsay angay mobayad sa pagpaputol sa kahoy?

Dear Atty. Divine,

Dunay kahoy ang among silingan nga nagtakilid na ug kuyaw nga matumba sa among pinuy-anan. Amo na nga gihangyo ang tag-iya sa kahoy nga ipaputol, apan nagdumili siya sa kay gusto niya nga magtunga mi sa gasto sa pagputol.

Ako siyang giingnan nga iyang responsibilidad ang pagpaputol sa kahoy kay siya man ang tag-iya niini, apan mi-insist siya nga magtunga mi sa gasto kay apil daw ko sa maka-benefit sa pagputol sa kahoy.

Ang akong pangutana kon makapugos ba siya nako sa pagbayad sa gasto sa pagpaputol sa iyang kahoy? Daghang salamat. —Mario

Dear Mario,

Dili gyud siya makapugos nimo sa pag-share sa expenses sa pagputol sa kahoy nga iyang gipanag-iya, kay base sa Article 483 sa atong Civil Code of the Philippines, kini nagkanayon nga kon adunay dakong kahoy nga hapit na matumba ug makarisgo og posibleng kadaot sa ubang tawo, o property, then obligado ang tag-iya sa kahoy sa pagpaputol niini ug siya ang angay nga mobayad sa expenses.

Busa, sultii siya nga dili ka obligado nga mo-share sa expenses sa pagpaputol sa iyang kahoy ug siya isip tag-iya mao ang angay nga mobayad sa expenses niini. Thanks and God bless. - Atty. Divine

Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.