Akong pakyukbo ni Santo Niño

Ang milagro nga akong nasinati diha nga gidam-agan ko og dakong truck nga nagguroy og taas kaayong trailer didto sa Catmon kaniadtong 1995, gisibya gyud sa Balitang Bisdak sa GMA-7 kaniadtong Miyerkules sa hapon.

Daghan ang nakakita ug wala sila makatuo. Bisan gani ang TV reporter nga nag-interview nako nga si Alan Domingo, nakapanglingulingo ug mura’g dili gyud makatuo.

Gipangutana gyud ko pag-ayo sa reporter kon milatay ba gyud sa akong paa ug lawas ang ligid sa truck. Akong giingnan nga agi og pagmatuod nga gilatayan gyud ko sa ligid, nagisi man gani ang akong karsones.

Iya kong gipangutana kon anaa pa ba ang karsones. Maayo gani kay nakit-an pa namo. Nakatuo na gyud si Alan Domingo kay nakita man gyud niya ang gisi sa karsones nga nagmatuod nga wala ko mamakak.

Bitaw, 23 ka tuig na ang milabay, apan kadtong nahitabo kanako, daw lab-as pa kaayo sa akong panumdoman. Nagsakay ko og motorsiklo paingon dinhi sa Sugbo kaniadtong Hunyo 25, 1995 diha nga gidam-agan ko sa Prime mover.

Sa nagpaingon pa kanako ang truck ug nagtuo nga mamatay na gyud ko, nakasinggit ko sa pagpangayo’g tabang. “Santo Niño, tabangi ko!!!!”

Dayon, nadungog nako ang linugapak sa akong motorsiklo nga nabagnod sa karsada nga napasok ilawom sa may makina sa Prime mover, ug nabatyag ko nga ang ligid milatay sa akong paa.

Wala ko mawad-i sa maayong panimuot, gihuwat nako kon unsay mahitabo nako. Nagtuo gyud ko nga nangabali ang akong kabukogan, ilabi na dapit sa paa nga gilatayan sa ligid samtang naghigda na ko sa karsada.

Nababag sa karsada ang Prime mover. Gikitoy ko ang akong mga tudlo sa tiil, ug mihinay ko sa pagbangon. May tawo nga miduol kanako ug nangutana kon unsay akong mga bali sa kabukogan.

Akong giingnan nga wala man, kay nakalakaw man ko, ug gisaka nako ang drayber sa Prime mover ug gikuhaan sa iyang lisensiya. Ako pa gani ang nag-traffic kay daghang sakyanan ang wala dayon makaagi.

Wala makatuo ang mga nakakita nga buhi ko human sa maong aksidente. Diha ko mituo nga gamhanan gyud si Señor Santo Niño nga maoy miluwas kanako.

Kaniadtong 1981, dunay mihatag kanako og imahen sa Santo Niño nga ceramic. Ako kining giampoan kada adlaw. Pagka 1995, giluwas ko niya gikan sa kamatayon.

Pag-uli nako sa balay, nabali ang liog sa imahen. Miadto ko sa kapilya ni Santo Niño diha sa Basilica ug naghilak nga nagpasalamat. Karon, may mihatag kanako og laing gamay’ng imahen sa Santo Niño nga kauban ko kanunay sa akong paglakaw. Pit Senyor!